Erdoǵannyń nazaryn aýdarǵan oqýshynyń úıine Túrkııa elshiliginen qonaq keldi

ÓSKEMEN. QazAqparat – Shyǵys Qazaqstan oblysy Tarbaǵataı aýdanynyń 1-synyp oqýshysy Baıjigit Baıkúbenov Túrkııa Prezıdenti Rejep Taıyp Erdoǵannyń nazaryn aýdarǵan bolatyn. Hakim Abaıdyń óleńin jatqa oqyp, estafetany Rejep Taııp Erdoǵanǵa joldaǵan balaqaıdyń aýylyna Túrkııa elshiliginiń ókilderi keldi. Karantın shekteýlerine baılanysty keshikken túrikterdiń bul sapary jaıly QazAqparat tilshisine oqýshynyń ákesi aıtyp berdi.

Aýylǵa keletinin aıtqan

Uly Abaıdyń 175 jyldyq mereıtoıynda 9 jasar Láılim Rysqalı aqyn óleńin jatqa oqyp, estafetany Memleket basshysy Qasym-Jomart Toqaevqa joldaǵan edi.

Al Baıjigit esimdi tarbaǵataılyq bala estafetany Túrkııa Prezıdentine baǵyttaýǵa nıet bildirgen. Onyń bul batyldyǵyna ákesi Dýlat Baıkúbenov qoldaý tanytty.

Vıdeo jelige júktelgennen keıin arada 1 jarym jyldaı ýaqyt ótken soń aýylǵa Anadoly elindegi TRT AVAZ telearnasynda Baıjigit jaıly sıýjet kórsetilgeni týraly habar jetti.

Sodan keıin Túrkııanyń Qazaqstandaǵy elshiligi habarlasyp, ákesi men ulyn Nur-Sultan qalasyna shaqyrǵan.

Elordadaǵy elshilik ǵımaratynda oqýshyǵa Túrkııa Respýblıkasy Prezıdentiniń bas keńesshisi ıAlchyn Topchýdyń arnaıy haty, ipad mp3 player jáne Túrkııa týy bederlenip, «Baıjigit» degen jazýy bar altyn bilezik syıǵa tartyldy.

Rejep Taııp Erdoǵanmen Zoom arqyly tikeleı baılanysqa shyǵý da josparlanǵan-tuǵyn. Alaıda Prezıdenttiń shuǵyl jumysy shyǵyp, bul oı iske aspaı qalǵan.

«Sol kezde Túrkııa elshiliginiń ókilderi bizdiń aýylǵa keletinin aıtqan edi. Karantın shekteýlerine baılanysty keıinge shegerilgen bul sapar bıyl iske asyp otyr», - deıdi Dýlat Baıkúbenov.

«Qazaqtyń qonaqjaılyǵyn kórsetýge tyrystyq»

Osy jyldyń mamyr aıynda Tuǵyl aýylyna elshilik janyńdaǵy bilim bóliminiń basshysy Abdýlmýtalıb Chetın men Túrkııadaǵy TRT AVAZ telearnasynyń basshysy Mehmed Zahıd qonaqqa keldi. Maqsaty – Baıjigittiń kindik qany tamǵan jermen tanysý, úıin, oqyp jatqan mektebin kórý.

«Búginde aıadaı aýylymyzda 3 myńǵa jýyq adam turady. Osyndaı qonaqtardyń kelýi – bizdiń aýyl úshin tarıhı oqıǵa. Muqym aýyl halqy asyǵa kúttik. Birinshi Óskemenge barǵan túrikter kólikpen 8 saǵat júrip Tuǵylǵa jetti. Eki aralyqtyń joly shuryq tesik qoı. Olar mundaı joldy kórmegen shyǵar. Sol jaǵynan uıalsaq ta qazaqtyń qonaqjaılyǵyn kórsetýge barynsha tyrystyq», - deıdi Dýlat.

Qonaqtar mektepke baryp, oqýshylarǵa syılyqtar bergen. Odan soń aýyldyq meshitke bas suǵyp, Quran kitap taratty. Budan bólek, jaǵdaıy tómen 30 otbasyna azyq-túlikpen kómek kórsetken.

«Qarapaıymdylyǵyna, mádenıettiligine tań qaldyq. Eki eldiń tatýlyǵyn, syılastyǵyn erekshe baǵalaıtynyn sezdirdi. Ulttyq taǵamdarymyzdan dám tatqyzyp, aýyldyń tynys-tirshiligimen, halqymen tanystyrdyq», - deıdi tarbaǵataılyq.

Baıjigittiń úıine qonǵan túrikter kelesi kúni tańerteń jolǵa shyqqan. Sol kezde Dýlat «Týrasyn aıtyńyzdarshy, aýylymyzǵa ne úshin keldińizder?» dep surapty.

Buǵan olar «Byltyr ýáde berdik qoı. Sózde turatynymyzdy kórsetkimiz keldi. Áıtpese erteń Baıjigit «Túrkııa halqy aıtqan ýádesin oryndamaıdy» dep bizdi synaýy da múmkin ǵoı» dep jaýap bergen.

«Abdýlmýtalıb Chetın keterinde rızashylyǵyn bildirip, Túrkııa eline qonaqqa shaqyrdy. Túrik jerine kelgen ár qazaqty baýyrndaı kóretinin aıtty. Baıjigit qonaqtardyń erte ketkenine qapalandy. Biraq aldaǵy qazan aıynda Rejep Taıyp Erdoǵan Qazaqstanǵa keledi eken. Sol kezde buıyrsa Baıjigitpen kezdesedi dep josparlap otyrmyz. Túrkııa Prezıdentine erekshe syılyq daıyndap jatyrmyz», - deıdi Dýlat Baıkúbenov.