Erdoǵan Qazaqstan Prezıdentin «Túrki áleminiń aqsaqaly» dep atady

ANKARA. QazAqparat - Búgin Ankaraǵa resmı saparmen kelgen QR Prezıdenti Nursultan Nazarbaevpen kelissózderden keıingi birlesken málimdeme barysynda Túrkııa Prezıdenti Rejep Taııp Erdoǵan Elbasyn «Túrki áleminiń aqsaqaly» dep atady, dep habarlaıdy QazAqparat tilshisi.

«Túrkııa-Qazaqstan Joǵary deńgeıli yntymaqtastyq keńesiniń úshinshi jınalysy aıasynda bas qosyp otyrmyz. Qazaqstan Prezıdenti qurmetti Nursultan Nazarbaev bastaǵan delegatsııany qonaq qylǵanyma rızamyn. Túrki áleminiń aqsaqalyna taǵy bir márte qosh keldińiz deımin. 2015 jyly Qazaqstanda bastalǵan Joǵary deńgeıli yntymaqtastyq keńesiniń úshinshi jıynyn Ankarada ótkizdik. Sońǵy ret 3 qyrkúıekte Qyrǵyzstanda ótken Túrki tildes memleketter yntymaqtastyq keńesiniń VI sammıti barysynda bas qosqan edik», dep eske aldy Túrkııa Prezıdenti.

Sonymen qatar Rejep Erdoǵan Qazaqstan Prezıdentimen jeke jáne delegatsııalarmen kezdesý barysynda ekijaqty, kún tártibinde turǵan barlyq máseleler shynaıy talqylanǵanyn basa aıtty.

«Óte aýqymdy ári tıimdi kezdesý ótti. Osy sapar aıasynda elderimizdiń arasynda birqatar qujatqa qol qoıyldy. Jańa ǵana bes kelisimniń qol qoıý rásimin aıaqtadyq. Keshe Ankarada ótken ınvestıtsııalyq forým aıasynda jalpy somasy shamamen 2 mıllıard dollardan asatyn 20-dan astam qujatqa eki eldiń jaýapty mekemeleri men jeke menshik sektor kompanııalarynyń ókilderi qol qoıdy... Atajurtymyz Qazaqstannan kelip, bizdi qýantyp otyrǵan qurmetti Prezıdent Nazarbaevqa jáne delegatsııasyna alǵysymdy bildiremin. Tereń de tamyrly tarıhymyzdan nár alǵan Túrkııa men Qazaqstan qarym-qatynasynyń bolashaqta odan saıyn nyǵaıyp, damıtynyna senemin»,- dedi ol.

Aıta keteıik, osyǵan deıin Elbasy Nursultan Nazarbaev pen Túrkııa Prezıdenti Rejep Taııp Erdoǵan arasyndaǵy kelissózderden keıin eki eldiń arasynda birqatar qujatqa qol qoıylǵandyǵyn habarlaǵanbyz.