Erdoǵan barsha musylmandardy Mıanmadaǵy shıelenisti sheshýge shaqyrdy

ASTANA. QazAqparat - Búgin elordada bastalǵan Islam yntymaqtastyǵy uıymnyń ǵylym jáne tehnologııalar jónindegi birinshi sammıtinde Túrkııa prezıdenti Redjep Taıyp Erdoǵan barshy musylman memleketterin Mıanmadaǵy «adamzat dramasyn» retteýge úndedi, dep habarlaıdy QazAqparat.

«Mıanmadaǵy baýyrlarymyz qıyn jaǵdaıǵa tap boldy. Olar óz úılerin tastap ketýge májbúr, jan-jaqqa bosyp ketti. Biz osy bir ádiletsizdikti birge toqtatýymyz qajet. Bangladesh pen Mıanma úkimetterimen kelise otyryp, ol jerdegi «adamzat dramasyn» sheshýimiz kerek. Sebebi Bangladeshke qashyp barǵan musylmandar da kómekke zárý. Biz olarǵa kómektesýge daıyn ekenimizdi jetkizdik. Endi, barlyq musylman memleketteri birigip, ol jaqtaǵy baýyrlarymyzǵa qol ushyn sozýy  qajet» - dedi Erdoǵan.
 

Aıta keteıik, óz sózinde Túrkııa basshysy musylmandar arasyndaǵy saýatsyzdyq joıý máselesin de kóterdi. Sebebi búginde álem boıynsha musylmandardyń jartysy saýatsyz.  

Islam yntymaqtastyǵy uıymy - 1969 jyly 25 qyrkúıekte musylman memleketteri basshylarynyń   Rabatta ótken konferentsııasynda negizi qalanǵan eń iri jáne yqpaldy úkimettik ári halyqaralyq musylman uıymy. Qazirgi ýaqytta ol jalpy sany shamamen 1,5 mıllıard adamdy qamtıtyn 57 eldiń basyn biriktirip otyr.

IYU-nyń negizgi qaǵıdattary mynalar: tolyq teńdik; ár halyqtyń óz taǵdyryn ózi sheshý quqyǵyna degen qurmet; ishki isterine aralaspaý; memleketterdiń egemendigin, táýelsizdigin jáne aýmaqtyq tutastyǵyn qurmetteý; IYU-ǵa múshe memleketter arasyndaǵy daýly máselelerdi kelissóz, araaǵaıyndyq nemese arbıtraj arqyly beıbit jolmen sheshý; uıymǵa múshe memleketter aýmaqtarynyń tutastyǵyna, sonymen birge saıası táýelsizdigine de qarsy kúsh qoldanbaý nemese qoqan-loqqy kórsetpeý.

Qazaqstan 1995 jyly Islam yntymaqtastyǵy uıymynyń tolyq quqyly múshesine aınaldy.