Erbolat Tólepbaı «Umaı ana» kartınasyn satýdan túsken 10 mln teńgeni Túrkııaǵa aýdardy
Aıta keterligi, sýretshi Túrkııadaǵy apattan keıin «Qazaq óneriniń Túrkııaǵa kómegi» aktsııasyna uıytqy bolyp, zerger, sýretshi, ánshi, akter, aqyn, jazýshy sııaqty mádenıet jáne óner aıdynynda júrgen barsha áriptesterin is-sharaǵa belsendi atsalysýǵa shaqyrǵan bolatyn.
«Jarııalanǵan úndeýden keıin aýktsıon máselesimen aınalystym. Úlken aýktsıondy kútkenshe birshama ýaqyt ótedi. Al qazirgideı qıyn kezeńde Túrkııa tarapy qyrýar qarajatqa muqtaj. Sol sebepti jedel aýktsıon uıymdastyrdym. Oǵan negizinen Qanat Tólemetov bastaǵan bes jigit atsalysty. Rústem Qaraev, Erjan Omarov, Vıtalıı Kım, Azamat Syrǵabaev sekildi atymtaı jomarttar bul usynysty qostady», - deıdi ErbolatTólepbaı.
Sýretshi aýktsıonǵa «Umaı ana» kartınasyn qoıǵan soń ony joǵarydaǵy esimderi atalǵan 5 jigit birigip, 10 mln teńgege satyp alǵan.
«Bul óte sapaly salynǵan birtýar shyǵarmamnyń biri edi. Atymtaı jomart bes jigit qosylyp, aýktsıon kezinde kartınany 10 mıllıon teńgege baǵalady. Olar aqyldasa kele shyǵarmany da Túrkııa tarapyna syılyq retinde tapsyrýǵa sheshim qabyldady. Sodan Túrkııanyń Almatydaǵy Bas konsýldyǵyna baryp, 10 mıllıon teńgeni Túrkııadaǵy apattan zardap shekken baýyrlarymyzǵa kómek retinde aýdardyq. «Umaı ana» kartınasyn da tabystadyq», - dedi ol.
Erbolat Tólepbaıdyń jeke muraǵatynan