Erbolat Dosaev naýqastardan AITV anyqtalýyna baılanysty pikir bildirdi
«Siz basshylyq etken jyldary ekinshi ret VICh juqtyrý oqıǵasy tirkeldi. Qandaı da bir jaýapkershilik sezinesiz be?» - dep suraq qoıdy tilshiler Ortalyq kommýnıkatsııalar qyzmetinde ótken baspasóz máslıhatynda.
«17 jyl ótse de meniń jaýapkershiligime qatysty suraqtar áli qoıylady. Men 2006 jyly sala basshysy retinde óz jaýapkershiligimdi túsingenmin, ózimdi jaýapty adam retinde kórsettim dep te oılaıdym. Shymkenttegi jaǵdaıdy da sol kezdegi Densaýlyq saqtaý mınıstrligi anyqtaǵan edi, mundaǵy máseleler jóninde de habardarmyz. Jumys jalǵasyp jatyr, osy jyldary qadaǵalaý aıtarlyqtaı kúsheıtildi. Sondyqtan, reglamentke sáıkes, reanımatsııada kómek kórsetilgen soń 30 kúnnen keıin barlyǵy tıisti test tapsyrady. Sonda eki adam anyqtaldy, odan keıin 2-13 maýsym kúnderi qalalyq JITS ortalyǵymen barlyq qajetti jumystardy júrgizdik jáne taǵy bir jaǵdaıdy anyqtadyq», - dedi Erbolat Dosaev.
Onyń aıtýynsha, qazir barlyq materıal QR DSM Almaty sanıtarlyq-epıdemıologııalyq baqylaý departamentine berildi. Sonymen qatar, Bas memlekettik sanıtarııalyq dáriger qosyldy, komıssııa jumys istep jatyr.
Sonymen birge, qala ákimi 2021-2022 jyldary AITV juqtynǵandar sany artqanyn aıtty.
«Olardyń 82%-inde jynystyq jolmen juqtyrý tirkelgen, qalǵany – TJ jáne esirtki zattaryn tutynýdan bolǵan. Sondyqtan, bul klınıkaǵa keldi me, álde klınıkadan juqty ma, ony komıssııa anyqtap jatyr. Másele klınıka basshylyǵyn jumystan shettetý men shyǵarýda emes, barlyǵy jumys ornynda óz jaýapkershiligin arqalaýy kerek. Komıssııa qorytyndysy boıynsha, barlyq qajetti sheshim qabyldanady», - dedi Erbolat Dosaev.
Eske sala keteıik, Almaty ortalyq klınıkalyq aýrýhanasynda jatqan úsh naýqastan AITV anyqtalǵan bolatyn.
Densaýlyq saqtaý mınıstrligi AITV juqtyrǵan úsh naýqaspen baılanysta bolǵan 593 adam tekserilip jatqanyn málimdegen edi.