Erbolat Dosaev EQQDB vıtse-prezıdentimen qalanyń ınfraqurylymyn jaqsartý jobalaryn talqylady

ALMATY. QazAqparat- Almaty ákimi Erbolat Dosaev Eýropa qaıta qurý jáne damý bankiniń (EQQDB) vıtse-prezıdenti Alan Pııýmen qalanyń ınfraqurylymyn jaqsartý jónindegi jobalardy jáne shaǵyn jáne orta bıznesti damytý jónindegi bastamalardy talqylady, dep habarlaıdy QazAqparat tilshisi.

Almaty ákimdigi men EQQDB sońǵy 13 jyl ishinde turǵyn úı-kommýnaldyq sharýashylyqty, ınfraqurylymdy modernızatsııalaýǵa jáne kólik sektoryn damytýǵa baǵyttalǵan bastamalardy ilgeriletý aıasynda jemisti yntymaqtasýda.

Kezdesý barysynda trolleıbýs parkin jańartý perspektıvasy jáne tartqysh qosalqy stantsııalardy (190 trolleıbýs, 10 qosalqy stantsııa) modernızatsııalaý máselelerine erekshe nazar aýdaryldy.

Taraptar sondaı-aq jeńil relsti kólik (JRK) qurylysy boıynsha birlesken yntymaqtastyq múmkindigin talqylady. Eýropalyq qaıta qurý jáne damý banki buryn (2015-2018 jj.) Almaty qalasynda JRK júıesin salý jáne paıdalaný jobasyn iske asyrýdyń jaılylyǵy (ekologııalyq, ekonomıkalyq jáne áleýmettik taldaýdy qosa alǵanda) boıynsha zertteýler júrgizgen bolatyn.

Kezdesý barysynda qaladaǵy ekologııalyq ahýal máseleleri talqylandy. Aǵymdaǵy jyldyń aqpan aıyndaǵy aldyn ala derekter boıynsha aýada azot dıoksıdi (NO2) normasynyń 6 ese, kúkirt dıoksıdi (SO2) jáne azot oksıdi (N2O) normasynyń 5 ese artýy tirkelgen.

Lastanýdyń negizgi kózderiniń biri ónerkásiptik kásiporyndar (37%). Saraptamalyq qorytyndyǵa sáıkes, JEO-2 modernızatsııalaý qajet. EQDB jobanyń kredıtorlarynyń biri retinde ákimdik tarapynan qoldaý surady, ol kómek kórsetýge daıyn ekenin rastady. Jobany tabysty iske asyrý úshin birlesken jol kartasy ázirleneli jáne qabyldanatyn bolady.

Kezdesý barysynda Almatyda energııa tıimdiligi jáne energııa únemdeý boıynsha ESG-jobalaryn iske asyrý, sý, jylý shyǵyndaryn azaıtý úshin ınjenerlik ınfraqurylymdy modernızatsııalaý jáne taǵy basqa máseleler talqylandy.

Qalany damytýdyń mańyzdy baǵyty ony tsıfrlandyrý. Taraptar qalanyń ınfraqurylymy men protsesteriniń joǵary dáldiktegi «tsıfrlyq kóshirme» jobasyn iske asyrý boıynsha usynysty qarady. Júıe klımattyń ózgerýi, qoǵamdyq kólik, halyqtyń ósýi jáne t. b. máselelerdi qosa alǵanda, túrli jaǵdaılarda ınfraqurylymdy dereý-testileý derekterin óńdeýge arnalǵan platforma.

Shaǵyn jáne orta bıznesti qoldaý jáne damytý maqsatynda birlesken baǵdarlamalar men bastamalar talqylandy. Aıta keterligi, kásipkerlik salasy qala úshin zor mańyzǵa ıe – bul sektorda 10 almatylyqtyń 6-y jumys isteıdi.

Kezdesý sońynda taraptar usynylǵan jobalardy bir aı merzimde zerdeleýge jáne odan ári yntymaqtastyq maqsatynda talqylaýlarǵa qaıta oralýǵa kelisti.