Erbolat Dosaev: Bıyl Almatyǵa 450 myń sheteldik týrıst keledi
«Týrıstik ınfraqurylymdy damytý aıasynda bıyl qalanyń nómirlik qory 3 myń jatyn orynǵa ulǵaıady. 2023 jyldyń sońyna deıin 390 bólmeli taǵy 2 qonaqúı («Medeu Park Hotel», «Parkside living) ashylady. Sonymen qatar, 3 kempıng-aımaq, Kishi jáne Úlken Almaty shatqaldarynda uzyndyǵy 150 shaqyrym bolatyn 10 taý marshrýty qurylady. Bul marshrýttar tsıfrlandyrylady», - dedi Erbolat Dosaev elordalyq Ortalyq kommýnıkatsııalar qyzmetinde ótken baspasóz máslıhatynda.
Óz sózinde ákim Prezıdenttiń Túrgen men Qaskeleń arasyndaǵy taý klasteriniń Shyǵys jáne Batys bólikterin keshendi damytýdy tapsyrǵanyn atap ótti.
«Bul maqsatta Mádenıet jáne sport mınıstrligimen birlesip, Almaty aglomeratsııasy sheńberinde Túrgennen bastap Qaskeleńge deıingi taý klasterin damytý tujyrymdamasy ázirlenip jatyr. Ony bıyl jyl sońyna deıin aıaqtaý josparlanǵan. 2023 jyly sheteldik týrıster sany 450 myń adamǵa deıin, ishki týrıster sany 1,5 mln adamǵa deıin ósedi dep kútilip otyr», - dedi Almaty ákimi.