Erbolat Dosaev: Bank júıesin kúsheıtý jumystary jalǵasady

NUR-SULTAN. QazAqparat - Bank júıesin kúsheıtý jumystary jalǵasady. Bul týraly búgin Úkimet otyrysynda «Úkimet pen Ulttyq Bank arasyndaǵy 2019 jylǵa arnalǵan makroekonomıkalyq saıasat sharalaryn úılestirý týraly kelisim jóninde» baıandaǵan QR Ulttyq bank tóraǵasy Erbolat Dosaev aıtty, dep habarlaıdy QazAqparat tilshisi.

«Qamtamasyz etilgen kredıtorlardyń basym quqyqtaryn júzege asyrý kásiporyndardy jáne bankterdiń nesıe portfelin qalypqa keltirýge jaǵdaı jasaıdy. Joǵary sot organdarymen bankrottyq salada quqyq qoldaný tájirıbesin pysyqtaý boıynsha jumys júrgiziletin bolady. Bank júıesin kúsheıtý boıynsha jumystar jalǵasady. Ulttyq banktiń sońǵy satydaǵy kredıtory fýnktsııasyn tolyq iske asyrý mańyzdy bolýda», - dedi ol.

Onyń atap ótýinshe, táýekelge baǵdarlanǵan qadaǵalaýdy iske asyrý bankterdiń aktıvter sapasyn baǵalaý (Asset Quality Review) josparlaryna da baılanysty bolady. Búgin ony júrgizýge daıyndyq bastaldy. AQR kapıtaly jetkiliksiz bankterdi anyqtap, aldyn-alý sharalaryn erte kezeńde qoldanýǵa kómektesedi.

«Qolma-qol aqshasyz tólemderdiń qoljetimdigin arttyrý jáne olardyń ınfraqurylymyn damytý boıynsha sharalar qabyldanatyn bolady. Іri mámileler boıynsha esep aıyrysýdy qolma-qol aqshasyz nysanǵa aýdarý boıynsha sharalar qabyldanady», - dedi E.Dosaev.

UB basshysy tutynýshylyq kredıtteý salasynda halyq úshin táýekelder kúsheıip jatqanyn basa aıtty.

«Bul jaǵdaılarda kredıttik seriktestikter, onlaın kredıtorlar jáne lombardtar sııaqty banktik emes uıymdardy retteý boıynsha usynystar qarastyrylady. Kelisim sharttarynyń ashyqtyǵyna, sondaı-aq tutynýshylardyń, ásirese halyqtyń áleýmettik osal toptarynyń quqyqtaryn qorǵaýǵa qoıylatyn talaptar kúsheıtiledi», - dedi E.Dosaev.