Erbolat Dosaev: Almatynyń basty jumys berýshisi – shaǵyn jáne orta bıznes
Jıyn barysynda Erbolat Dosaev búginde Almaty qalasy ákimdiginiń mańyzdy mindetteriniń biri megapolıstiń ekonomıkasyn qalpyna keltirý jáne órship turǵan geosaıası táýekelder jaǵdaıynda ony odan ári damytý ekenin jetkizdi.
«Qalany qysqa merzim ishinde qalpyna keltirý jáne onyń kelbetin burynǵydan da jaqsartý qajet. Bıylǵy jyldyń 3-20 aqpan aralyǵynda men qalanyń barlyq aýdandaryn aralap, turǵyndarmen jáne bıznes ókilderimen kezdesýler ótkizdim. Sonyń negizinde ákimdik qala bıýdjetine engiziletin ózgeristerdi daıyndady. Shaǵyn jáne orta bıznes ekonomıkanyń negizin qalaýshy jáne Almatynyń basty jumys berýshisi bolyp tabylady, sebebi onda qalanyń árbir úshinshi turǵyny eńbek etedi. Osyǵan baılanysty, shaǵyn jáne orta bıznesti qalpyna keltirý jáne keltirilgen zalaldy óteý jumysy ákimdiktiń basym mindeti»,-dedi Almaty qalasynyń ákimi.
«Atameken» ulttyq kásipkerler palatasynyń málimeti boıynsha osy jyldyń 1 naýryzynda 1 413 zardap shekken shaǵyn jáne orta bıznes sýbektisi tirkelgen.
Zalaldyń aldyn ala somasy 34 mlrd teńge. Qazirgi tańda infokazakhstan.kz portalynda 1201 ótinim tirkeldi, onyń ishinde 3,774 mlrd teńge somasyna 1 009 shaǵyn jáne orta bıznes sýbektisine keltirilgen zalal ótelgen.
Sonymen qatar, ákim adamı kapıtaldy damytý ákimdiktiń turaqty nazarynda ekenin aıtty. Almaty bıýdjeti de osyǵan baǵdarlanǵanyn, ıaǵnı qala bıýdjeti áleýmettik salaǵa baǵyttalǵan.
« 2022 jyly bilim berýge 275,2 mlrd teńge qarastyrylǵan, onyń ishinde jergilikti bıýdjetten - 196,2 mlrd, respýblıkalyq bıýdjet – 79 mlrd. Bıýdjetti naqtylaý aıasynda qosymsha 9,4 mlrd teńge bólý josparlanyp otyr. 2022 jyly oqýshy ornynyń tapshylyǵyn azaıtý maqsatynda 46 mekteptiń qurylysy jalǵasyp, 14 245 oqýshy ornyna eseptelgen 22 mektep bıyl paıdalanýǵa beriledi. Sondaı-aq Bostandyq, Áýezov, Almaly, Jetisý aýdandaryndaǵy mektepterge japsarlas 5 ǵımarattyń qurylysyn aıaqtaýǵa qosymsha 1,8 mlrd teńge bólý usynyldy»,-dedi ol.