Erbolat Dosaev: Almatyda ekologııalyq taza kólikter kóbeıedi
Ákimniń aıtýynsha, 2021 jylǵa arnalǵan esep boıynsha, negizgi lastaýshy kózder: kólik – 56 paıyz, jylý elektr stantsııalary men ónerkásiptik kásiporyndar – 39 paıyz, jeke turǵyn úı sektory – 5 paıyz.
«Osy esepterge súıene otyryp, 2022 jyly biz myna baǵyttarǵa basymdyq bermekpiz. Búgingi tańda qalada 2441 birlikti quraıtyn 8 qoǵamdyq kólik parki bar, qoǵamdyq kólikterdiń tek 15-i ǵana elektrli avtobýs. Qoǵamdyq kólikti odan ári damytý tek ekologııalyq turǵydan taza kólik túrlerin satyp alýǵa baǵyttalady. Ústimizdegi jyldyń 1 toqsanynda gazben júretin 300 qoǵamdyq kólik satyp alynady, bul ekologııalyq taza kólik úlesin (30%-dan 37,4%-ǵa deıin) arttyrady», - dedi Erbolat Dosaev.
Sondaı-aq megapolıs ákimi 1 mıllıon aǵash otyrǵyzý boıynsha «Jasyl Almaty» baǵdarlamasyn júzege asyrý jalǵasatynyn, 300 myńnan astam kóshet otyrǵyzylatynyn atap ótti. Bir turǵynǵa shaqqandaǵy jasyl alańdar kóleminiń kórsetkishi (7,7-den) 12 sharshy metrge deıin ulǵaıady. Sondaı-aq bıylǵy jyly granttar esebinen aýanyń sapalyq quramyn ólsheıtin 60 qurylǵy ornatylady. Ólshemder men olardy taldaýdan keıin ABR jáne AirVision kompanııalaryn tarta otyryp, aýa sapasyn jaqsartýdyń bas jospary ázirlenetin bolady.
«Almatynyń ınfraqurylymyn damytýǵa keletin bolsaq, halyq sanynyń ósýi men kóshi-qonnyń joǵary qarqyny jaǵdaıynda kólik, áleýmettik, turǵyn úı jáne basqa da ınfraqurylymdardy damytý máselesi erekshe ótkir tur», - dep atap ótti qala basshysy.
«...Jańa Almatyny keshendi damytý jospary aıasynda keminde 100 shaqyrym jańa jol salynady. 2022 jyly 2 jol aıyryǵy men Áýezov kóshesin kesý jumystary aıaqtalady. Osy jyldyń mamyr aıynda 2 metro stantsııasyn paıdalanýǵa berý josparlanǵan. Bul kúndelikti jolaýshy aǵynyn 30-dan 86 myńǵa deıin arttyrady», - dedi Erbolat Dosaev.