Erbolat Bedelhan: Qoǵamdaǵy dúnıelerdi óner arqyly kórsetý kerek
Spıkerler Qazaqstannyń kreatıvti ekonomıkasynyń damýy jaıynda tájirıbe bólisti jáne bul jumystyń shet memleketterde qalaı júrgizilip jatqany týraly áńgimeledi.
Otandyq kreatıvti ındýstrııa úshin jańa talanttardy qalaı tabýǵa bolatyny, sondaı-aq Qazaqstannyń daryndy jastary men olardyń prodıýserleri qandaı qıyndyqtarǵa tap bolatyny talqylandy. Budan bólek, qazaqstandyq medıany qazirgi jaǵdaıda qalaı damytý kerektigi týraly aıtyldy.
Prodıýser Erbolat Bedelhannyń pikirinshe, qoǵamda bolyp jatqan dúnıelerdi óner arqyly kórsetý kerek.
«Mýzykanyń da ózi – aqparat. Mýzyka – meniń quralym. 2014 jyly Seýlge barǵan saparymda Ońtústik Koreıa jumsaq kúsh arqyly qalaı álemdi tańǵaldyrǵanyn baıqadym. Birinshisi – ınternet, ekinshisi – bı. Bıdi de, áleýmettik jelini de eshkim tolyqtaı baqylap ustaı almaıdy. Bı – ol óner, óner – ol erkin dúnıe. Іshki bolmysymyzdy halyqpen bólisý úshin erkindik kerek. «Nemen bólisý, qandaı kontent shyǵarý kerek?» degenge keletin bolsaq: mýzykany alaıyqshy, ol – tutas eldegi kóńil-kúıdi kórsetý. Qýanyshymyz bolsyn, muńaıatyn kezderimiz bolsyn – onyń bári bizdiń bolmysymyz, kelbetimiz. Sondaı-aq Ninety One tobymen jumys isteý barysynda úlken naryq qalyptastyrý kerek ekenin túsindim. Jalpy aıtqanda sóz bolsyn, óner bolsyn olar – jumsaq kúsh. Qoǵamǵa aýyr dúnıelerdi jumsaq kúsh arqyly jetkizý qajet», – dedi Erbolat Bedelhan.
Sonymen qatar ol qazaqtyń negizgi bolmysyn, túpki nusqasyn kontent retinde shyǵarý mańyzdy ekenin atap ótti.
«Ómir bolǵan soń biz naqty ári shynaıy ómir súrýimiz kerek. Birinshiden óz-ózimizdi aldamaýymyz qajet. Eń jamany biz óz-ózimizdi aldap qoıamyz. Qazaqtyń «uıat bolady», «bolmaıdy» degen sózimizben ózimizdi tejeı beremiz. Biz kóterilmeıtin taqyryptarǵa baryp, solardy jaryqqa shyǵarýymyz kerek. Óner sony halyqqa jetkizýdiń taptyrmas quraly. Bul jerde «ulttyq qundylyq» degen sóz bar sony umytpaýymyz qajet. Ideologııany, ulttyq qundylyqty qorǵaý úshin biz qaıtalanbas kontent degenge talpynamyz. Ony qaıdan alamyz? Taǵy sol Eýropaǵa, Amerıkaǵa moıyn sozamyz. Al ulttyq qundylyq degendi syrttan ala almaımyz. Óıtkeni ol bizdiń ishimizden pisip shyǵatyn bolmysymyz. Sol sebepti biz esklıýzıvti dúnıe dep shetelge jaltaqtamaı, ózimizdiń túpki bolmysymyzdy, ulttyq qundylyqtarymyzdy kontent qylyp shyǵarýymyz qajet», – dedi Erbolat Bedelhan.
«Õzen» medıa kompanııasynyń negizin qalaýshy Aızatýlla Hýseın zamanaýı qazaqstandyq mýzykanyń qalaı jáne kimge arnalǵany týraly aıtyp berdi. Onyń aıtýynsha, qazaq tilinde shyǵatyn OZEN jumysyn negizinen orystildi aýdıtorııa tyńdaıdy: orys tilindegi pikirler shamamen 80% quraıdy.
«Biz úlgi alyp, tańǵalyp júretin elder shyǵarmashylyq jaǵynan álsireı bastaıdy. Qazirgi tańda Qazaqstanda óz talanttary men daryndary bar. Olar gúl sııaqty ashylýy kerek, sodan keıin biz óz ıdeıalarymyzdy álemge jetkizemiz», – deıdi Aızatýlla Hýseın.
Sonymen qatar ol búgingi medıakeńistikte Qazaqstandyq kontent jasaýshylardyń da yqpaly artyp kele jatqanyn, jyl saıyn býyn almasyp, qarqyndy jumystar júzege asyp jatqanyn jetkizdi.
«Reseı aqparattyq túrde jabylyp jatyr. Erteń búkil álem úshin orys tilindegi kontentti kim jasaıdy? Mýzyka, vıdeo, YouTube, Tik-Tok kim túsiredi? Biz muny isteı alamyz. Óıtkeni, biz de bundaı deńgeıge jettik», – dedi ol.