Erbol Qarashókeev topyraq sapasy nasharlaǵan alqaptar týraly túsinik berdi

ASTANA. QazAqparat – Sortańdanǵan jerdiń alańy shamamen 800 myń gektardy qurady. Bul týraly Senattyń jalpy otyrysynda QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«Respýblıkanyń barlyq sýarmaly jerlerin melıoratsııalyq monıtorıngpen qamtý maqsatynda ótken jyly gıdrogeologııalyq-melıoratsııalyq qyzmettiń qurylymy ońtaılandyryldy. Sortańdanǵan jerdiń alańy shamamen 798,4 myń gektardy qurady, onyń ishinde qatty sortańdaný dárejesinde 133,6 myń gektar. Mundaı jerlerdiń negizgi alańdary Qyzylorda, Túrkistan, Almaty, Jambyl oblystary men Jetisý oblystarynda ornalasqan», - dedi E. Qarashókeev.

Onyń aıtýynsha, qazirgi kezde erozııaǵa baılanysty 29,3 mln gektar is júzinde odan ári paıdalanýǵa jaramsyz.

«Bul rette, jyl saıyn 5 mln gektardan 7 mln gektarǵa deıingi alańda topyraqtyń sapalyq sıpattamasyn aıqyndaý maqsatynda aýyl sharýashylyǵy jerlerine zertteý júrgiziledi», - dedi mınıstr.

Budan buryn habarlanǵandaı, bıyl 1,5 mln gektar sýarmaly jer ıgeriledi.

Qazaqstan aýmaǵynda jańbyrlatyp sýaratyn mashınalar shyǵaratyn zaýyttar salynady.