Erbol Qarashókeev sút ımporty qashan azaıatynyn aıtty

ASTANA. QazAqparat – Qazaqstan 573 myń tonna sút ımporttap jatyr. Bul týraly Senatta ótip jatqan Úkimet saǵatynda Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

Bıyl jalpy qýattylyǵy 58 myń tonna bolatyn jarma men makaron ónimderi jáne 21 myń tonnalyq krahmal ónimderin óndiretin 11 ınvestıtsııalyq jobany iske asyrý bastaldy. Azyq-túlik ónimderin óndirýdiń jalpy kóleminde sút ónerkásibiniń úlesi 16% qurady. 2022 jyly óndirilgen 3,9 mln tonna taýarlyq súttiń 1,9 mln tonnasy 172 kásiporynda óńdeldi. Іshki tutyný kólemi 2,3 mln tonna

, - dedi E. Qarashókeev.

Onyń aıtýynsha, sapaly shıkizattyń jetispeýi ári qymbat bolýy sútti qaıta óńdeýdegi tejeýshi faktorǵa aınaldy.

Óndirilgen súttiń 73 paıyzy jeke qosalqy sharýashylyqtar úlesine tıesili. Nátıjesinde ishki naryqta sút ónimderi ımportynyń úlesi joǵary. Bul turǵyda shıki sút túrinde qaıta eseptesek, shamamen 573 myń tonnaǵa jetip otyr. Osy máseleni júıeli sheshý úshin taýarlyq sút fermalarynyń jelisin qurý boıynsha Soltústik Qazaqstan oblysynyń tájirıbesin taratý qadamdary jasalyp jatyr. Osy maqsatta bıyl respýblıkalyq bıýdjetten jalpy qýattylyǵy jylyna 373 myń tonna sút óndiretin 65 taýarlyq sút fermasyn qurýǵa 100 mlrd teńge bólindi. Aldaǵy eki jylǵa 50 taýarlyq sút fermasyn qurýǵa qosymsha 113 mlrd teńge bólý josparlanyp otyr. Bul qadamdar eki jyl ishinde el óńirlerinde 115 iri taýarlyq sút fermasyn qurýǵa jáne otandyq sút zaýyttaryn jetkilikti kólemde sapaly shıkizatpen qamtamasyz etýge, ımportqa táýeldilikti 573 myń tonnadan 33 myń tonnaǵa deıin tómendetýge múmkindik beredi

, - dedi mınıstr.

Onyń sózine qaraǵanda, sary maıdy, irimshik jáne qurǵaq sútti óndirýge shıkizat satyp alýǵa óńdeý kásiporyndarynyń shyǵyndary qosymsha sýbsıdııalanady. Keıingi 7 jylda sútti mal sharýashylyǵyn damytýǵa arnalǵan sýbsıdııalar kólemi 1,8 esege artyp, 2022 jyly 22,5 mlrd teńgeni qurady (2016 jyly – 12,1 mlrd teńge).