Erbol Qarashókeev paıdalanylmaı jatqan sýarmaly jer kólemin aıtty
«Únemi ósip kele jatqan sý resýrstarynyń tapshylyǵy jaǵdaıynda sýdy esepke alyp, utymdy bóletin tsıfrlyq tehnologııalardy engize otyryp, kanaldar men sý qoımalaryn salý jáne rekonstrýktsııalaý máselelerin ózekti ári der kezinde kóterilgen máseleler dep esepteımiz.
Kanaldar men sý qoımalaryn rekonstrýktsııalaý jáne qalpyna keltirý jobalaryn iske asyrý nátıjesinde 2021 jyly sý sharýashylyǵy ınfraqurylymy júrgizilgen alań 1,6 mln gektardy qurady, onyń ishinde 1 mln 527 myń gektar jerde óńdep ósirilýde, bul 2020 jylǵa qaraǵanda 16,8 myń gektarǵa kóp. Atalǵan alańnyń 1 mln 182 myń gektary nemese 77,4%-y jer ústi sýarý tásiline tıesili, 96,3 myń gektary nemese 6,3%-y – negizinen jappaı sý basý ádisimen sýarylatyn kúrish alqaptary, tek 248,4 myń gektarǵa nemese 16,2%-yna ǵana zamanaýı tamshylatyp nemese jańbyrlatyp sýarý paıdalanylady», - dedi E. Qarashókeev.
Statıstıka derekteri boıynsha sýarmaly jerlerde maıly, dándi, azyqtyq daqyldar, kókónis-baqsha daqyldary, maqta, kartop, kúrish, qant qyzylshasy ósiriledi.
«Sonymen qatar jyl saıyn 200 myń gektarǵa jýyq jer sýarylmaı paıdalanylady, ıaǵnı maqsatyna saı paıdalanylmaıdy. Osyǵan baılanysty oblystar ákimdikteri nysanaly maqsaty boıynsha paıdalanylmaıtyn jerlerdi alyp qoıyp, zańnamada belgilengen tártippen adal jer paıdalanýshylarǵa berý jumystaryn jandandyrýy qajet», - dedi mınıstr.