Erbol Qarashókeev latıfýndısterdiń esimin jarııalaý týraly: Áýeli Ádilet mınıstrligimen aqyldasaıyn

ASTANA. QazAqparat – Májilistegi Úkimet saǵatynda depýtat Marat Báshimov Jer kodeksinde alqap ıeleriniń deregin ashyq jarııalaý baǵytyndaǵy talaptar oryndalmaı otyrǵanyn másele etip kóterdi, dep habarlaıdy QazAqparat tilshisi.

«Jer kodeksi degen Konstıtýtsııadan keıin turǵan zań emes pe!? Ol qujatta jerdi ıelengen jeke jáne zańdy tulǵalardyń esimi ashyq derekkózde jarııalanýy kerektigi aıqyn jazylǵan. Bul másele tipti birinshi kýrsta oqıtyn kez kelgen zańgerge de túsinikti. Parlament qabyrǵasynda osyny aıtýdyń ózi kúlkili. Jer kodeksi qoldanysqa engenine úsh jyl bolsa da, aýyl sharýashylyǵy maqsatyndaǵy jerdi kimder ıelenip otyrǵany áli kúnge jasyryn. Bul túrimizben quqyqtyq memleketti qalaı quramyz?» - dedi Májilis depýtaty.

Aýyl sharýashylyǵy mınıstri Erbol Qarashókeevtiń aıtýynsha, qazir agroónerkásiptegi jer telimderiniń qaı kompanııaǵa tıesili ekeni jasyryn emes.

Onlaın resýrsta ol týraly málimet bar. Endi atalǵan kompanııalardyń artynda kimder turǵanyn jarııalaý qalyp otyr.

«Ózderińiz bilesizder, jer ýchaskeleri aýyl sharýashylyǵy salasynda qaı kompanııalardyń ıeliginde ekeniniń bári onlaında anyq kórinip turady. Siz ári qaraı sonyń ıelerin kórsetýdi aıtyp otyrsyz ǵoı. Ol máseleni Ádilet mınıstrligimen pysyqtap, jazbasha túrde jaýap bereıin», - dedi mınıstr.