Erbol Qarashókeev: Kartoptyń byltyrǵydaı qymbattaýyna jol bermeımiz

NUR-SULTAN. QazAqparat – Úkimet otyrysynan keıin BAQ ókilderiniń suraqtaryna jaýap bergen QR Aýyl sharýashylyǵy mınıstri Erbol Qarashókeev kartop baǵasy byltyrǵydaı qymbattamaıtynyna senimdi ekenin jetkizdi, dep habarlaıdy QazAqparat tilshisi.

«Biz qazir kartop boıynsha qajettilikterimizdi ózimizde bar jıyntyqpen tolyqtaı jaýyp otyrmyz. Sáýir aıynda ózimizde ósirilgen jas qyryqqabat sórege túsedi. Qajettilikti sonyń esebinen jabamyz. Tek kartop boıynsha jetilip úlgermeı me dep qaýiptengen edik» - dedi mınıstr Úkimet otyrysynan keıin kýlýarda.

Erbol Qarashókeev kartop tapshylyǵynyń aldyn alý jumystary byltyrdan beri júrip jatqanyn eske saldy.

«Ózbekstannan 20 myń tonnadan kem emes jas kartopty qalypty baǵamen ákelý úshin kelissózder júrgizgenbiz. 2020-2021 jylǵy maýsymdaǵydaı kartop baǵasynyń 800 teńgege deıin barýyna bıyl jol bermeımiz», - dedi ol.

Vedomstvo basshysy salalyq Ulttyq joba aıasynda 2025 jylǵa qaraı birneshe aýylsharýashylyq ónim túgeldeı ózimizde óndiriletinin atap ótti.

«Agroónerkásip keshenin damytýdyń Ulttyq jobasyn qabyldadyq. 2025 jylǵa deıin irimshik, sút, qaımaq, et sııaqty birqatar azyq-túlik ónimin óz óniderimizben qamtamasyz etý deńgeıin 100 paıyzǵa jetkizemiz. Qant boıynsha 80 paıyz óz ónimimizben qamtamasyz etemiz», - dedi Erbol Qarashókeev.

Al Saýda jáne ıntegratsııa mınıstri Baqyt Sultanov baǵany baqylaý jumystary Bas prokýratýramen birge atqarylatynyn málim etti.

«Baǵa máselelerinde, árıne, daıyn ónimniń saýda ústemesi bolady. Bizde saýda ústemesiniń 15 paıyzdan aspaýy qajettigi týraly norma bar. Bul jergilikti atqarýshy organdardyń quzyretindegi másele. Tıisti jumys júrgizilýde. Búgingi tańda Bas prokýratýramen birge baǵanyń negizsiz ósýine jol bermeý úshin iri kóterme saýda naryqtaryn tekserý jumystary júrgizilýde», - dedi – dedi mınıstr.