Erbol Qarashókeev eks-ákim Danıal Ahmetovtiń sýbsıdııa alǵan qyzyna qatysty pikir bildirdi
Búgin Úkimet otyrysynan keıin tilshiler mınıstrden Danıal Ahmetovtiń qyzy Pavlodar oblysynda sýbsıdııa alǵan jalǵyz jeke kásipkerlik ekenin jáne oǵan bul kómek ne sebepti berilgenin surady.
Óz kezeginde E.Qarashókeev sýbsıdııa berý kezinde salada týystyq qarym-qatynas eskerilmeıtinin aıtty.
«Bizde memlekettik agrarlyq júıede 51 myń nysan tirkelgen. Olardyń barlyǵy aýyl sharýashylyǵy taýarlaryn óndirip jatyr. Fermerler óńdep júrgen jerin, mal basyn kórsetedi. Bul rette olardan «Ákeń nemese anań kim, óziń kimsiń?» dep eshkim suramaıdy. Júıe obektıvti túrde qarap, tıisti negiz bolsa, qarajat aýdarady. Aqsha bolmasa, kezekke turady. Osynyń bári júıege engizildi. Biz qazirdiń ózinde 120 mıllıard sýbsıdııa bóldik, on myńdaǵan adam sýbsıdııa aldy. Sondyqtan kóterip otyrǵan másele boıynsha bizge resmı saýal joldasańyzdar, bul sýbsıdııa boıynsha naqty jaýap beremiz», - dedi mınıstr.
Onyń aıtýynsha, sýbsııadııa bólgen kezde adamı faktor joıylǵan.
«Mınıstr retinde bizdiń aýyl sharýashylyǵy ónimderin óndirýshilerdi bólip-jarmaımyn, ıaǵnı olardyń týystarynyń bedeline nemese dáýletine qaramaımyn. Eń bastysy, bizde zań men ereje bar. Biz quqyqtyq memlekette ómir súrip jatyrmyz», - dedi vedomstvo basshysy.