Erbol Qarashókeev astyqtyń boljamdy túsimin atady

NUR-SULTAN. QazAqparat – Elimizde gektaryna 9,5 tsentnerden astyq bastyrylýda. Bul týraly búgin Úkimet otyrysynda QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat tilshisi.

«AQSh Aýyl sharýashylyǵy mınıstrligi men Astyq jónindegi halyqaralyq keńestiń esebine sáıkes, barlyq negizgi astyq óndirýshi elderde bıdaı óndirisiniń tómendeýi kútilýde. Máselen, Kanadada bıdaı jınaý ótken jylmen salystyrǵanda 34,5 paıyzǵa, Reseıde 15 paıyzǵa, Amerıkada 7 paıyzǵa tómendemek. Astyq jónindegi halyqaralyq keńestiń baǵalaýynsha, álemde bıdaı óndirý kólemi 781,7 mln tonnany quraıdy», - dedi mınıstr.

Onyń atap ótýinshe, bıyl elimizde dándi jáne maıly daqyldardy jınaý alańy 18,9 mln gektardy qurady.

«Oblys ákimdikteriniń derekteri boıynsha ónimdilik gektaryna 9,5 tsentner bolǵanda dándi jáne maıly daqyldardyń boljamdy jalpy túsimi shamamen 18 mln tonna bolady. Búginde shamamen 14,3 mln tonna dándi daqyl jáne 200 myń tonna maıly daqyldar jınaldy. Bul rette oblystarda maqsary jınaý júrip jatqanyn, al barlyq maıly daqyldardy jappaı jınaýǵa osy aıdyń sońynda kirisetindigin atap ótken jón»,- dedi Erbol Qarashókeev.