Eraly Toǵjanov Jańaózen halqyn Amal merekesimen quttyqtady

JAŃAÓZEN. QazAqparat - Búgin Amal merekesi kúni Jańaózen qalasyna Mańǵystaý oblysynyń ákimi Eraly Toǵjanov jumys saparymen keldi, dep habarlaıdy QazAqparat oblys ákimdiginiń baspasóz qyzmetine silteme jasap.

Oblys basshysy aldymen kópbalaly analar Zylıha Shildıbaeva, Násıma Torbaı, Sáýle Taǵalbaeva jáne Marııa Amıdanova atty analardyń úılerine arnaıy baryp, olardy merekemen quttyqtap, syı-syıapat jasady.

«Altyn alqa» memlekettik nagradasynyń ıegeri Sáýle Taǵalbaeva, «Kúmis alqa» ıegeri Násıma Torbaı Memleket basshysyna kópbalaly analardy qorǵaý maqsatynda qolǵa alynǵan jatqan ıgi isterge rızashylyǵyn bildirdi.

Odan keıin oblys basshysy «Munaıshy» mádenıet úıiniń aldyna kelip, qala, aýyl turǵyndaryn bereke men birliktiń meıramy bolyp esepteletin Amal merekesimen quttyqtady.

«Munaıshy» mádenıet úıiniń shyǵarmashylyq ujymy turǵyndarǵa «Amal keldi - Jyl keldi» atty merekelik kontserttik baǵdarlamany usyndy.

Qaladaǵy eńbek ujymdary arnaıy 20 aq kıiz úı tigip, turǵyndarǵa qazaq halqynyń ulttyq dástúrli taǵamdaryn usyndy. Jastar jaǵy qazaq kúresi, doıby sporttyq jarystaryna belsendilik tanytyp qatysýda, al, qyzdar ben jigitter án shyrqap, altybaqan tepti.

Jalpy, merekelik sharaǵa jınalǵan qala turǵyndarynyń kóńil-kúıi kóterińki. «Bul aýyzbirshiliktiń úlgisi dep bilemiz», deıdi jańaózendikter.