Eraly Toǵjanov: Turaqtylyq pen birlik – qazaqstandyq qoǵamnyń negizgi qundylyǵy
Óńir basshysy Eraly Toǵjanov qala turǵyndary men qonaqtaryn Qazaqstannyń kópultty halqynyń dostyǵy men kelisimi merekesimen quttyqtady.
«Halqymyzda «Birlik túbi – bereke» degen dana sóz bar. Táýelsizdik jyldarynda bizdiń barlyq qol jetkizgen jetistigimiz ben tabysymyz – birlik pen tatýlyqtyń arqasynda.
Memleket basshysy Qasym-Jomart Kemeluly Toqaev Qazaqstan halqy Assambleıasynyń 32-sessııasynda «Elimizdiń táýelsizdigi jáne aýmaqtyq tutastyǵy bárinen qymbat. El birligi osy myzǵymas qundylyqtarmen qatar turýǵa tıis. Sonda ǵana bolashaǵymyz baıandy bolady» degen bolatyn.
«Áralýandylyqtaǵy birlik» qaǵıdaty memleketimizdiń saıasaty men Qazaqstan halqy Assambleıasy qyzmetiniń negizgi baǵyttarynyń biri boldy jáne bola beredi», - dep atap ótti oblys ákimi.
Eraly Toǵjanov Assambleıa múshelerine, óńirdiń etnomádenı birlestikteriniń basshylaryna beıbitshilik, dostyq ıdeıalaryn túsindirý baǵytynda atqarylyp jatqan mańyzdy jumystar úshin alǵysyn bildirdi.
«Búginde oblysymyzda beıbitshilik pen kelisimde 90-nan astam ult ókilderi turady. Assambleıa 16 etnomádenı birlestiktiń, óz etnosynyń ana tili mene memlekettik tildi, salt-dástúrlerin zerdeleý boıynsha jeksenbilik mektepterdiń belsendi jumys isteýine uıytqy bolyp otyr.
Turaqtylyq pen birlik – qazaqstandyq qoǵamnyń negizgi qundylyqtary. Biz birlesip jumys istesek, talaı qıyndyqty jeńip, problemalardy sheshe alatynymyzǵa senimdimin.
Árbir aqtóbelik birlikti nyǵaıtý jolynda tynymsyz eńbek etýi tıis. Óıtkeni, birlik bar jerde – tirlik bar», - dep atap ótti oblys ákimi.
Eraly Toǵjanov birlik pen turaqtylyqty nyǵaıtýǵa eleýli úles qosqan óńirdiń 9 turǵynyna alǵys hat tabystady.
Olardyń qatarynda etnomádenı birlestikterdiń, áleýmettik salanyń ókilderi, BAQ qyzmetkerleri bar.