Eraly Toǵjanov shetelde oqıtyn stýdentterdi vaktsınalaý máselesin aıtty

NUR-SULTAN. QazAqparat – «Bolashaq» baǵdarlamasynan tys shetelde oqıtyn stýdentterge de Sinopharm vaktsınasyn qabyldaý múmkindigi beriledi, dep habarlaıdy QazAqparat tilshisi.

«Bilim jáne ǵylym mınıstrligi «Bolashaq» baǵdarlamasy boıynsha shetelge shyǵatyn stýdentter Dúnıejúzilik densaýlyq saqtaý uıymynyń tirkeýinen ótken Sinopharm vaktsınasynyń eki dozasyn qabyldaıtyny týraly kelisimge qol jetkizgeni týraly málimet shyqty. Aıtyńyzshy, nelikten mundaı irikteý tásili qoldanylyp otyr? Nelikten «Bolashaq» stýdentterine ǵana osyndaı múmkindik beriledi?», - dep surady BAQ ókili Ortalyq kommýnıkatsııalar qyzmetinde ótken brıfıngide.

Saýalǵa QR Premer-Mınıstriniń orynbasary Eraly Toǵjanov jaýap berdi.

«Azamattardyń eshqandaı konstıtýtsııalyq quqyǵy buzylyp jatqan joq. Bul másele boıynsha habarlasqandar bar. Biz ony sheshý joly koronavırýstyń taralýyn boldyrmaý jónindegi Vedomstvoaralyq komıssııaǵa engizip te jatyrmyz. Sondyqtan stýdentterimizdiń siz ataǵan sanatyna da Sinopharm vaktsınasynyń eki dozasyn qabyldaýǵa ruqsat beriledi.

Beısenbi kúni Vedomstvoaralyq komıssııanyń otyrysyn ótkizemiz. Sol kezde tıisti sheshim qabyldaımyz», - dedi Eraly Toǵjanov.