Eraly Toǵjanov Prezıdenttik kadrlyq rezerv múshelerine aqyl-keńesin aıtty
«Adamı kapıtal týraly másele kún tártibinde tur jáne ol búgin ǵana paıda bolǵan suraq emes. Memlekettik qyzmette júrgenimizge biraz ýaqyt boldy. Ideıalardy aıtý ońaı, biraq júzege asyrý – bólek áńgime. Derekter boıynsha, búgingi rezervshilerdiń 90 paıyzy – memlekettik qyzmette eken. 13 myń adamnyń ishinen 300 adamdy iriktedi, onyń ishinde 180 adam jumysqa qabyldandy. Ashyǵyn aıtqanda, munda myqtylardyń arasynan ozyp shyqqan myqtylar otyr deýge bolady. Bul – sizderge júktelgen úlken senim», - dedi E. Toǵjanov EKSPO kesheninde ótken forýmda.
Óz sózinde spıker Elbasy Nursultan Nazarbaev pen Memleket basshysy Qasym-Jomart Toqaevtyń el bolashaǵyna baǵyttalǵan sharalardy kóptep qolǵa alǵanyn, óz mamandyǵyn tereń meńgergen azamattyń ǵana básekege qabiletti bolatynyn atap ótti.
«Sońǵy jyldary tutas dúnıejúziniń eń úlken máselesi – koronavırýs pandemııasy boldy. Bizdiń elimizde de óte qıyn jaǵdaı boldy, 400 myńǵa jýyq adam aýyryp, 4 myń adamnan aıyrylyp qaldyq. Sonyń bárinen sabaq alý kerek, 2008 jyly úlken dúnıejúzildik daǵdarys bolǵanda, Elbasy árbir daǵdarysty memlekettiń damý múmkindigi dep qarastyrý qajetin aıtqan edi. Pandemııa da – úlken daǵdarys, kózge kórinbeıtin vırýstan bir-aq kúnde mıllıondaǵan halqy bar qalalar turalap qaldy. Aıta ketsem, túrli halyqtardyń basyn biriktirgen uıymda 9 jyldaı jumys istegenmin. Kózge kórinbeıtin, qolǵa ustalmaıtyn etnıka, din máseleleri de el úshin óte mańyzdy. Mundaı máseleler burq ete qalsa, kez kelgen memlekettiń bolashaǵyna qater tóndiredi. Turaqty memlekettiń damýy úshin mindetti túrde qoǵamdyq kelisim bolýy kerek. Sondyqtan kózge kórinbeıtin dúnıelerdi júrekpen sezinip, bolashaqta eskerýimiz kerek», - dep keńes berdi Premer-Mınıstr orynbasary.
E. Toǵjanov memlekettiń damýy úshin eń aldymen deni saý ult pen sanaly qoǵa qajet ekenin aıtty.
«Dala fılosofııasy deımiz ǵoı, qazaqtar baıaǵyda-aq «Birinshi baılyq – densaýlyq» dep aıtyp ketken. Densaýlyǵy myqty ult qana damı alatynyn barsha álem túsindi dep oılaımyn. Ekinshiden – sanaly qoǵam bolashaqta aýqymdy damı alady. Bizde ártúrli jobalar boldy. Sanaly qoǵam qalyptasqan jerde – bilimdi ult ta, básekege qabiletti ult ta, tártipke negizlgen, salt pen dástúrdi tereń qabyldaıtyn qoǵam bolady, mundaı qoǵamda qıyn máselelerdi eńserýge bolady. Mysaly Japonııa, Sıngapýr, 1 mlrd 400 mln halqy bar Qytaıdy mysal etýge bolady. Bizdiń elimizde osyndaı qoǵam qalyptasty dep aıtýǵa áli erte. Sanaly qoǵamda el toqta degende toqtaıdy, saqtyq sharalaryn saqtaıdy. Qıyn epıdemıologııalyq jaǵdaıda da, qansha adam ómirden ótip jatqanda da vırýsqa senbeıtinderdi kórgen shyǵarsyzdar. Biraq jeme-jemge kelgende daý-damaı shyǵyp jatady, biraq onyń bári kesh bolady. Bul – bizdiń kúnde aınalysyp jatqan suraqtarymyz, osyny eskerýimiz kerek», - deıdi Eraly Toǵjanov.
Sóz sońynda spıker pandemııanyń Qazaqstandaǵy qoǵamǵa qalaı yqpal etkenin aıtty.
«Ár qıyndyqtyń bir artyqshylyǵy bolady. Pandemııa arqyly sana-sezimimizde tóńkeris boldy. Talaı dúnıeniń tezirek damýyna yqpal etti, máselelerdi qysqa merzimde sheshý qajet boldy. Mysaly pandemııa bolmaǵanda, kompıýtermen qamtamasyz etý máseleleri taǵy 5 jylǵa sozylar ma edi. Óz elimizde kompıýter, noýtbýk qurastyratyn kompanııalar ashyldy. Qoǵam dáriger men ustazdardyń qadirin túsindi. Óz balalaryn oqytyp sharshaǵan ata-analar bar. Qazir jaǵdaı qalyptasyp kele jatyr. «Ashyq» jobasy ashylyp, aýrý qarqynyn baqylaý kúsheıdi. Buryn ýaqyt jumsap, jınalystarda bas qosyp júrsek, qazir alys jerlerden, aýdandardan kelmeı-aq, onlaın rejımde sóılesetin múmkindik týdy», - dedi Eraly Toǵjanov.