Eraly Toǵjanov qurylatyn jańa jumys oryndary týraly aıtty
«Úkimet eńbek adamynyń bedelin arttyryp, tabysyn kóterýge baǵyttalǵan keshendi naqty jumystardy iske asyryp jatyr. Birinshiden, áleýmettik saıasatta qarapaıym eńbek adamynyń tabysyn arttyrýǵa basymdyq berilip otyr. Atap aıtqanda, bıyl eńbekaqy teńsizdigin boldyrmaýǵa baǵyttalǵan jumystar aıasynda elimizde 900-ge jýyq kásiporynda 600 myńnan astam jumyskerdiń jalaqysy orta eseppen 25 paıyzǵa artty. Azamattyq qyzmetshiler jalaqysy orta eseppen 19-dan 45 paıyzǵa deıin kóterildi. Budan bólek, Memleket basshysynyń sheshimimen kelesi jyldan bastap eń tómengi jalaqy mólsheri artatyn bolady. Nátıjesinde, 1,7 mln jumyskerdiń tabysy ósedi», - dedi E. Toǵjanov.
Onyń aıtýynsha, jańa jumys oryndaryn ashý baǵytynda júıeli sharalar qabyldanyp jatyr. Nátıjesinde, jyl basynan beri 1 mln-nan astam adam jumyspen qamtý is-sharalaryna tartylyp otyr.
«Jumyssyzdyqtyń deńgeıin aınalamyzdaǵy jaǵdaıǵa, pandemııaǵa qaramastan, 4,9 paıyz deńgeıinde saqtap qalýǵa múmkin boldy. Naqty qabyldanǵan sharalardyń arqasynda osy deńgeıde qalyptasty. Sonymen qatar, 12 qazanda Úkimet otyrysynda bekitilgen ulttyq jobalar aıasynda 2025 jylǵa deıin 1,7 mln jańa jumys oryndaryn qurý josparlanyp otyr», - dedi Úkimet basshysynyń orynbasary.
Budan buryn habarlanǵandaı, elordada «Jalpyǵa Ortaq Eńbek Qoǵamyna» atty respýblıkalyq forým ótti.
Táýelsizdiktiń 30 jyldyǵyna arnalǵan is-shara barysynda eńbek ardagerleri men «Eńbek joly» respýblıkalyq konkýrsynyń jeńimpazdaryn saltanatty marapattaý rásimi ótti.