Eraly Toǵjanov «Balkondaǵy sıyr» jobasynyń iske asyrylýymen tanysty
«Qazir ishki naryqty otandyq ónimdermen qamtamasyz etip, eńbek ónimdiligin arttyryp, turaqty jumys oryndaryn qurý kerek. Biz jumystyń bastalǵanyn kórip otyrmyz», — dedi vıtse-premer.
Tek 5 jyl ishinde AÓK salasynda 2,2 trln tenge kóleminde 500-den astam ınvestıtsııalyq joba iske asyrylatyny josparlanǵan. Jumyspen qamtýdyń túrli sharalarymen 500 myńnan astam adam qamtyldy.
Óz kezeginde óńir basshysy Ermek Marjyqpaev oblysta osy baǵytta naqty jumystar júrgizilip jatqanyn aıtty. 8 myńnan astam jańa jumys orny quryldy, onyń ishinde 5 myńǵa jýyǵy – turaqty, jalaqy 22% artty.
Máselen, kooperatıv basshysy Gúlmaıra Baımaqova «Bastaý-Bıznes» jobasy arqyly grant alyp, 2020 jyly Aqmola oblysynyń Qarabulaq aýylynda «Aýyldyń dámi qalada – Balkondaǵy sıyr» jobasyn iske qosty.
«Bizge azyq-túlik qajet, olardy ádette dúkenderden satyp alamyz. Qala turǵyndarynyń az bóligi ǵana jańa pisken kókónisterdi tikeleı baqshadan, al sútti tikeleı «sıyrdy saýý» arqyly alady. «Balkondaǵy sıyr» jobasy – bul dúkender men kóptegen deldaldardy aınalyp ótip, jańa, ekologııalyq taza sút ónimderin alýǵa múmkindik beretin joba», — dedi G. Baımaqova.
Joba boıynsha tabıǵı ónimderdi tutynǵysy keletin qala turǵyny óz aqysyna sıyr satyp alyp, ony baǵý úshin aýyl turǵynyna beredi, al ol sıyrdy kútýge – tamaqtandyrýǵa, sýarýǵa, saýýǵa jáne jańa sút ónimderimen qamtamasyz etýge mindetteledi.
Sonymen qatar Premer-Mınıstrdiń orynbasary Stepnogorsk qalasyndaǵy «Ar-aı» óndiris kooperatıviniń jumysymen tanysty. Baǵdarlama aıasynda halyqtyń áleýmettik osal toptaryna jumys oryndary men volonterlik kómek usynylady. Mysaly, «Ar-aı» kooperatıvinde birinshi kezekte kóp balaly otbasylarǵa jumys oryndary usynylady. Búgingi kúni kókónis ósirýmen kóp balaly analar aınalysady: olardyń qatarynda bes balasy bar ana, erekshe qajettilikteri bar bala tárbıelep otyrǵan ana jáne eki balany asyrap otyrǵan jalǵyzbasty ana bar.
Vıtse-premer Stepnogorsk qalasynda kókónisterdi ósirýge mamandandyrylǵan «Jylyjaı tehnologııalary» JShS, tiri balyqtardy kóbeıtý men janýarlarǵa, qustarǵa, balyqtarǵa arnalǵan vıtamındi jáne mıneraldy qospalardy ósirýmen aınalysatyn «Progress-Agro» JShS, sondaı-aq Birjan Sal aýdanynda qulpynaı jáne kókónis otyrǵyzatyn kásiporyndardyń qyzmetimen tanysty.
Kelesi nysan Býrabaı aýdanynda ornalasqan JK «Abdrahmanov» qurama jem zaýytynyń sút-taýar fermasy boldy.
Zamanaýı sút-taýar fermasy 2015 jyly jeke kásipker Bolat Ábdirahmanovtyń bastamasymen iske qosyldy. Memlekettik qoldaýdyń arqasynda jyl saıyn iri qara mal sany artyp keledi. Olar úshin tabıǵı kókónis qospalary bar arnaıy tamaqtaný rejımi bekitilgen.
Fermerdiń aıtýynsha, sımmental jáne monbelıar tuqymdy iri qara mal ákelindi.
«Qazirgi tańda fermada 500 bas iri qara jáne 109 bas jylqy bar. Bastapqyda 200 boldy, keıinirek olardyń sanyn ulǵaıtý kerek ekenin túsindim. «Agrobıznes-2020» baǵdarlamasy boıynsha Agrokredıt korporatsııasy arqyly 88 mln teńge nesıe aldym, oǵan Chehııadan 96 bas ІQM satyp aldym, bıyl «Yrys» baǵdarlamasy boıynsha taǵy 53 bas ákelýdi josparlap otyrmyz», — deıdi jeke kásipker.
Eraly Toǵjanov Kókshetaý qalasyndaǵy sút ónimderin óndiretin kásiporynda boldy. «Gormolzavod» eldegi eń dámdi balmuzdaqtyń birin óndirýmen ǵana emes, sonymen qatar basqa da sapaly sút ónimderimen de tanymal. Ótken jyly zaýytta sút qyshqyldy jáne tutas sút ónimderin shyǵaratyn jańa tseh iske qosyldy.