«Er Edige – Noǵaıly dáýiriniń jyry» atty dastan jaryqqa shyqty

AQTÓBE. QazAqparat - Aqtóbede «Er Edige – Noǵaıly dáýiriniń jyry» halyqaralyq ǵylymı-tájirıbelik konferentsııasy uıymdastyryldy. Konferentsııada jyr jınaǵynyń tusaýkeseri ótti, dep habarlaıdy QazAqparat tilshisi.

Túrki halyqtaryna ortaq mura «Edige» tarıhı-qaharmandyq eposynyń basty keıipkeri er Edige batyrdyń ómiri men erlik jolyn nasıhattaý maqsatynda Aqtóbede ǵylymı-tájirıbelik konferentsııasy ótti. Oǵan Qazaq ulttyq óner ýnıversıtetiniń professory Almasbek Almatov qatysyp, birneshe ǵalym lebizin onlaın joldady.

«Edige batyr – tarıhı tulǵa. Osy oraıda búgin orta ǵasyrdaǵy aıbyndy memleketimiz Altyn Ordanyń 750 jyldyǵyna tuspa-tus kelip otyrǵan sharanyń da orny erekshe. Altyn Ordanyń 750 jyldyǵy degenimizdiń ózi tarıhty taný, batyr babalarymyzdy ulyqtaý jáne basqosýdaǵy basty maqsatymyz Edige batyrdy tulǵalandyrý, tarıhı orynyn zerdeleý»,- dep atap ótti oblys ákimi Ońdasyn Orazalın. Aımaq basshysy aldaǵy ýaqytta da Edige batyr men onyń urpaqtaryna qatysty qolǵa alǵan tyń jobalar men zertteýlerdiń bári tabysty júzege asa beretindigin jetkizdi.

Aıta keteıik, ótken jyly «Edige» tarıhı-qaharmandyq eposynyń basty keıipkeri «Er Edige – Noǵaıly dáýiriniń jyrlary» atty mýzykalyq albomyn daıyndaý úshin 40-tam astam jyrshy-jyraýdyń oryndaýynda dybystyq jazbaǵa túsirý jumysy bastaldy. Іstiń basy-qasynda Qazaqstannyń eńbek sińirgen qaıratkeri Almas Almatov jetekshilik etken belgili ólketanýshylar, etnograftar, mýzyka zertteýshileri júrdi. Ár óńir jyrshy-jyraýlarynyń oryndaýyndaǵy ataqty Muryn jyraý Seńgirbaıuly jyrlaǵan «Qyrymnyń qyryq batyry», halyq aqyny Nurpeıis Baıǵanın jyrlaǵan «Qarasaı-Qazı», Nurtýǵan Kenjeǵululy jyrlaǵan «Máýlimnııaz», «Edige», «Oraq-Mamaı», «Qarasaı-Qazı» sekildi dastandary jınaqqa endi. Dastan bıyl 500 danamen jaryqqa shyqty. Mýzykalyq dastan eki bólikten turady. Ulttyq naqyshpen bezendirilgen birinshi kitapta «Qyrymnyń qyryq batyry» jáne «Edige batyr» týraly tarıhı málimet, jyrdy bizge jetkizgen jyraýlar, elimizdiń ár óńirinen sol muralardy jyrlaǵan jyrshy-jyraýlardyń ómirbaıany qazaq, orys jáne aǵylshyn tilinde berilse, kelesi kitapshanyń ishinde jyr jazylǵan 10 dısk ornalasqan. Mýzykalyq albom kitaphanalarǵa taratylyp, jyr qadirin biletin qalyń kórermen úshin teńdesi joq dúnıe bolmaq. Sondaı-aq ári qaraı sharalar legi «Edige degen er eken...» atty jyrshylardyń jyr keshine ulasty.