«Er Edige – Noǵaıly dáýiriniń jyry» antologııasy halyqaralyq baıqaýda úzdik atandy

AQTÓBE. QazAqparat –TMD elderi arasynda «Kitap óneri» XVIII halyqaralyq onlaın-baıqaýy ótti. Onda «Er Edige – Noǵaıly dáýiriniń jyry» mýzykalyq antologııasyna «Mádenıetter úndestigi» nomınatsııasy berildi, dep habarlaıdy QazAqparat tilshisi.

Aqtóbede Noǵaıly dáýiri jyrlarynyń antologııasyn Halyq shyǵarmashylyǵy ortalyǵy qolǵa alyp, jospardy iske asyrdy. Elimizdiń ár óńirinen shyqqan jyrshy-jyraýlardyń oryndaýynda 60 saǵattyq jyr jazyp alyndy. Antologııa jaryqqa shyqty. Byltyr bir top ǵalym men jyrshy-jyraý, folklortanýshy, ólketanýshynyń qatysýymen «Er Edige – Noǵaıly dáýiriniń jyry» taqyrybynda halyqaralyq ǵylymı-tájirıbelik konferentsııa ótip, albomynyń tusaýkeseri uıymdastyryldy.

«500 danamen jaryqqa shyqqan «Er Edige – Noǵaıly dáýiriniń jyry» mýzykalyq albomy ulttyq mýzyka tarıhyndaǵy eleýli oqıǵa ekeni sózsiz. Bul jınaq Máskeýde taǵy bir ataldy. TMD elderi arasynda ótken «Kitap óneri» XVIII halyqaralyq onlaın-baıqaýynda «Mádenıetter úndestigi» nomınatsııasy berildi. Eń bastysy – qazaqtyń «Er Edige» jyry eshqashan óshpesteı bolyp taspaǵa tústi. Mýzykalyq dastan eki bólikten turady. Birinshi kitapta «Qyrymnyń qyryq batyry» jáne «Edige batyr» týraly tarıhı málimet, jyrdy bizge jetkizgen jyraýlar, elimizdiń ár óńirinen sol muralardy jyrlaǵan jyrshy-jyraýlardyń ómirbaıandary, qazaq, orys jáne aǵylshyn tilinde berilse, kelesi kitapshanyń ishinde jyr jazylǵan 10 dısk ornalasqan.

Jalpy redaktsııasyn basqarǵandar – ıdeıa avtory, Aqtóbe oblysynyń ákimi Ońdasyn Orazalın, jobanyń jetekshisi, ataqty jyraý, Qazaq ulttyq óner ýnıversıtetiniń professory Almasbek Almatov, jobanyń ǵylymı jetekshisi,

Saqtaǵan Báıishev ýnıversıtetiniń professory, edigetanýshy Jumanazar Asan, ólketanýshy Bekarystan Myrzabaı, mýzykalyq redaktory, «Qazaqkontsert» memlekettik mekemesiniń solısi, «Daryn» memlekettik syılyǵynyń ıegeri Kúnsulý Túrikpen, dybys rejısseri Dastan Palmanov, mýzykalyq shyǵarmalardy óńdegen, kompozıtor Amangeldi Sándibaıuly, mýzykalyq albomdy basyp shyǵarǵan almatylyq «Qazaq kitaptary» JShS dırektory Orynbek Ánesov jáne ulttyq naqyshta bezendirgen sýretshi Aıbek Orynbasarov», - dedi oblystyq halyq shyǵarmashylyǵy ortalyǵy dırektorynyń orynbasary Gúlnar Seıtalına.

Aıta keteıik, qazir Aqtóbede «Er Edige» jyr mektebi bar. Búginde 40-tan astam jas tárbıelenýshileri bar.