Equilibrium Capital Qazaqstanda úsh ınvestıtsııalyq qor qurady

<p>Memleket basshysy Qasym-Jomart Toqaev Majarstan Premer-Mınıstri Vıktor Orbanmen Aqordadaǵy kezdesýden keıingi birlesken málimdemede Astana halyqaralyq qarjy ortalyǵyna baýyrlas eldiń alǵashqy kompanııasy tirkelgenin málim etti, dep habarlaıdy <a href="https://kaz.inform.kz/" target="_blank" rel="noopener">Kazinform </a>agenttigi.</p>

«Kelesi aptada Astanada eki el kásipkerleriniń qatysýymen bıznes-forým ótedi.
Taǵy bir mańyzdy baǵyt – kólik-logıstıka salasyndaǵy yntymaqtastyqty nyǵaıtý. Biz Transkaspıı dálizi aıasynda birlesken jobalardy iske asyrý joldaryn jan-jaqty talqyladyq. Bul saladaǵy yqpaldastyq ózara saýda-sattyqtyń jandanýyna tyń serpin beredi dep úmittenemiz. Sondaı-aq, atom energetıkasy, sý resýrstaryn basqarý, sırek kezdesetin metall óndirý salasynda mol múmkindik bar ekenin atap óttik. Qarjy salasyndaǵy baılanystar da qarqyndy damyp kele jatyr. Jaqynda Equilibrium Capital kompanııasy Astana halyqaralyq qarjy ortalyǵynda sheteldik qorlardy basqarý mártebesine ıe boldy», - dedi Prezıdent.

Memleket basshysynyń sózinshe, bul osyndaı mártebege qol jetkizgen Majarstannyń alǵashqy kompanııasy.

«Kásiporyn jasyl energetıka jáne densaýlyq saqtaý salasyndaǵy jobalardy qarjylandyra alady. Kompanııanyń Qazaqstanda úsh ınvestıtsııalyq qor qurýǵa nıeti bar», - dedi Qasym-Jomart Toqaev.

Buǵan deıin Aqordada Majarstan Premer-Mınıstrin qarsy alý saltanaty ótkenin jazǵan edik. 

Keshe keshke Vıktor Orbandy Astana áýejaıynda Premer-Mınıstrdiń orynbasary Serik Jumanǵarın qarsy alǵan bolatyn. Qazaqstan basshylyǵymen kelissóz barysynda Qazaqstan men Majarstan arasyndaǵy saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy yntymaqtastyqty odan ári tereńdetý máseleleri talqylanady dep josparlanyp otyr.

Aıta ketý kerek, erte Astanada Túrki memleketteri uıymynyń H sammıti ótedi. Oǵan Ázerbaıjan, Qyrǵyzstan, Túrkııa, Ózbekstan prezıdentteri, uıymǵa baqylaýshy memleketter – Majarstan men Túrikmenstan basshylary qatysady.