EO Lıvanǵa qosymsha kúshter ornalastyrýǵa kómektesý úshin 200 mln eýro bólýge daıyn

<p>ASTANA. KAZINFORM &mdash; Bul týraly Lıvanǵa sapary kezinde Eýropalyq Odaqtyń Syrtqy ister jáne qaýipsizdik saıasaty jónindegi Joǵarǵy ókili J.Borrel málimdedi. Eýroodaqtyń syrtqy saıasat vedomstvosy basshysynyń Beırýt qalasyna kelýi onyń osy laýazymdaǵy Taıaý Shyǵysqa jasaǵan sońǵy sapary bolýy múmkin, dep habarlaıdy Kazinform menshikti tilshisi.</p>

Beırýtke kelmes buryn Jozep Borrel Kıpr men Iordanııada bolyp, onda Taıaý Shyǵystaǵy daǵdarystardy retteý boıynsha kelissózder júrgizdi.

EO Lıvan áskerine eldiń ońtústigine qosymsha kúshter ornalastyrýǵa kómektesý úshin 200 mln eýro bólýge daıyn. 

J.Borrel sondaı-aq atysty toqtatý kelisimine qol jetkizý úshin Izraılge de, «Hezbollaǵa» da qysymdy kúsheıtýge shaqyrdy.

Eýropalyq dıplomat jeksenbi kúni Lıvan parlamentiniń spıkeri, «Hezbollanyń» odaqtasy, toppen qarym-qatynasqa arasha bolyp jatqan Nabıh Berrımen kezdeskennen keıin sóz sóıledi. 

«Eýroodaq retinde biz Lıvan halqyn, Lıvan armııasy men Lıvan ınstıtýttaryn qoldaımyz. Men premer-mınıstr Mıkatıden sizdiń armııańyzdy tek qarjylyq jaǵynan ǵana emes, tehnıkalyq jaǵynan da qalaı qoldaýǵa bolatynyn suradym», — dedi J.Borrel.

Ázirlenip otyrǵan kelisim BUU Qaýipsizdik Keńesiniń 2006 jylǵy soǵysty aıaqtaǵan qararyna sáıkes Lıvannyń ońtústiginen Lıtanı ózeniniń astyndaǵy «Hezbolla» jaýyngerleri men ızraıldik áskerlerdi shyǵarýǵa jol ashady. Lıvan áskerleri aýmaqty BUU bitimgershilik kúshteriniń qatysýymen patrýldeıdi. 

Lıvan armııasy eldiń dinı alýan túrliligin kórsetedi jáne ulttyq ınstıtýt retinde qurmetteledi, biraq onyń «Hezbollaǵa» óz erik-jigerin júktep salýǵa nemese Izraıl basqynshylyǵyna qarsy turýǵa áskerı áleýeti joq, dep jazdy eýropalyq BAQ.

J.Borrel sondaı-aq Eýropalyq Odaqtyń beısenbide Izraıl premer-mınıstri Bınıamın Netanıahý, onyń burynǵy qorǵanys mınıstri jáne «HAMAS»-tyń áskerı jetekshisin Gazada jalǵasyp otyrǵan 13 aılyq soǵysqa baılanysty adamzatqa qarsy qylmys jasady dep aıyptap, qamaýǵa alý ordenin bergen Halyqaralyq qylmystyq sotty (HQS) qoldaıtynyn rastady.

«Halyqaralyq qylmystyq sottyń sheshimderi saıası emes. Olar halyqaralyq quqyq normalaryna tolyq sáıkes qabyldanǵan. Ol bárine qatysty bolýy kerek. Jáne biz sotty qoldaımyz», — dep qosty J.Borrel.

Eske salsaq, budan buryn Izraıl Lıvandaǵy turǵyn úılerdi atqylap, 20-dan asa adam zardap shekkeni týraly jazdyq.