EO Joǵarǵy ókili Federıka Mogerınıge «Dostyq» ordeni tabys etildi

NUR-SULTAN. QazAqparat - Bishkektegi «Eýropalyq odaq - Ortalyq Azııa» 15-shi mınıstrlik konferentsııasyna birlesip qatysý qarsańynda búgin, 7 shildede Syrtqy ister mınıstri Beıbit Atamqulov Eýropalyq komıssııanyń vıtse-prezıdenti - Eýropalyq odaqtyń Syrtqy ister jáne qaýipsizdik saıasaty jónindegi Joǵarǵy ókili Federıka Mogerınımen kelissózder júrgizdi, dep habarlaıdy QazAqparat syrtqy saıasat vedomostvosynyń baspasóz qyzmetine silteme jasap.

Kezdesý barysynda taraptar Qazaqstan men EO yntymaqtastyǵynyń ózekti máselelerin, sonyń ishinde Eýropalyq Keńestiń prezıdenti Donald Týsktiń 2019 jylǵy mamyr aıyndaǵy Nur-Sultanǵa sapary sheńberinde qol jetkizilgen ekijaqty ýaǵdalastyqtardyń júzege asyrylýyn talqylady.

Taraptar QR-EO Keńeıtilgen seriktestik jáne yntymaqtastyq týraly kelisimdi jáne EO-nyń Ortalyq Azııa boıynsha jańa strategııasyn, onyń ishinde birlesken damý baǵdarlamalaryn ázirleýdi ýaqtyly iske asyrýdyń mańyzdylyǵyn atap ótti.

«Jańa Strategııa bizdiń ózara is-qımylymyzǵa qýatty serpin beredi, sonymen qatar árbir eldiń jáne jalpy óńirdiń ıgiligi úshin naqty praktıkalyq nátıjelerge qol jetkizýge baǵyttalǵan tyǵyz jáne úılestirilgen yntymaqtastyqtyń bastaýy bolady dep esepteımiz», - dedi B.Atamqulov.

Sondaı-aq júzdesý barysynda «Qazaqstan 2015 jyly Keńeıtilgen seriktestik pen yntymaqtastyq týraly kelisimge Ortalyq Azııa aımaǵyndaǵy qol qoıǵan alǵashqy el boldy. Kelisimniń tıimdi ımplementatsııasy ózara múddelerdiń barlyq spektri boıynsha qarym-qatynastarǵa sapaly serpin beredi» dep atalyp ótildi.

Saýda-ekonomıkalyq yntymaqtastyqty damytý perspektıvalary boıynsha QR Premer-Mınıstriniń EO múshe-elderi elshilerimen ekonomıkalyq jáne iskerlik máseleler jónindegi kezdesýlerdiń jańa formatyna úlken mán berilýde. Birinshi kezdesý ústimizdegi jylǵy 1 shildede ótken bolatyn.

Syrtqy saıasat vedomstvosynyń basshysy F.Mogerınıge Qazaqstan men EO arasyndaǵy dostyq qarym-qatynastardy damytýǵa qosqan jeke úlesi úshin alǵys aıtyp, QR Prezıdenti Qasym-Jomart Toqaevtyń tapsyrmasy boıynsha joǵary laýazymdy eýropalyq saıasatkerge I dárejeli «Dostyq» ordenin tabys etti. F.Mogerını EO-nyń Qazaqstan men Ortalyq Azııamen yntymaqtastyq jónindegi strategııalyq qujattaryn ázirleýge qomaqty úles qosty.

Óz kezeginde, Joǵarǵy ókil memleket basshylyǵy men Qazaqstan halqyna onyń qyzmetine joǵary baǵa bergeni úshin shynaıy alǵysyn bildirip, aldaǵy ýaqytta da EO men QR arasyndaǵy ózara tıimdi yntymaqtastyqty nyǵaıtý boıynsha qyzmet atqaratynyna sendirdi.

Aıta ketken jón, «Dostyq» ordeni Halyqtar arasyndaǵy beıbitshilikti, dostyq pen yntymaqtastyqty nyǵaıtýǵa qosqan úlesi úshin shetel azamattaryna beriletin Qazaqstan Respýblıkasynyń Joǵary memlekettik marapaty bolyp tabylady. 2019 jylǵy 2 shildede F.Mogerınıdi marapattaý týraly QR Prezıdentiniń №48 Jarlyǵyna qol qoıyldy.