EO Ulybrıtanııadan qoǵamdastyq quramynan shyǵý úshin 47,5 mlrd eýro talap etpek

LONDON. QazAqparat – Eýroodaq Ulybrıtanııa Brıýsselge qoǵamdastyqtan shyǵý úshin shamamen 47,5 mıllıard eýro (56,2 mıllıard dollar) tóleýi kerek dep sanaıdy. Bul týraly beısenbide Irlandııanyń RTE telearnasy EO-nyń 2020 jylǵa arnalǵan shoǵyrlandyrylǵan bıýdjeti týraly aldyn ala esebine silteme jasap habarlady.

Áńgime Ulybrıtanııanyń EO-dan shyǵýy týraly sharttyń 140 jáne 143-baptaryn ımplementatsııalaý týraly bolyp otyr. Onda London 2020 jylǵy 31 jeltoqsandaǵy jaǵdaı boıynsha túpkilikti nátıjege jetkizilmegen birlesken jobalar men baǵdarlamalardy iske asyrý úshin Ulybrıtanııanyń qoǵamdastyq bıýdjetinen bólingen qarajattyń bir bóligin Eýroodaqqa qaıtarýǵa mindetteletini aıtylǵan. Sonymen qatar, Birikken Koroldik qol qoıylǵan kelisimde EO sheneýnikterine saqtandyrý jáne zeınetaqy tólemderi boıynsha mindetteme aldy.

Endi bul somany qarasha aıynda Eýropalyq Esep palatasy bekitýi kerek.

Telearna atap ótkendeı, 6,8 mlrd eýro kólemindegi birinshi transhty London kelesi jyly EO-ǵa jiberýge mindetteme aldy. Jalpy alǵanda, Brexit týraly shartqa sáıkes tólemder birneshe onjyldyqqa bólinedi.

Ulybrıtanııa birneshe jylǵa sozylǵan kelissózderden keıin 2020 jyldyń 1aqpanyna qaraǵan túni Eýroodaqtan shyqty.