EO ókili Qazaqstan Úkimetimen Reseıge qaıta eksporttalyp jatqan taýarlar jóninde dıalog júrgizedi
Bul týraly ol Eýropalyq Odaqtyń Astanadaǵy ókildiginiń keńsesinde ótken baspasóz konferentsııasynda málim etti.
«Biz qazaqstandyq seriktesterimizben birge kúdik týdyratyn saýda kólemderin anyqtadyq. Qandaı taýarlardyń eksporty Eýropadan Qazaqstanǵa ulǵaıǵany jáne sol taýarlardyń Reseıge qaıta eksporttalatyn jaǵdaılary belgili boldy. Strategııalyq mańyzy óte joǵary taýarlardyń tizimin jasadyq. Bul taýarlar áskerı maqsatta qoldanylýy múmkin jáne biz olardy qos qoldanystaǵy nemese ozyq tehnologııalardyń taýary dep ataımyz», - dedi arnaıy ókil.
Onyń aıtýynsha, atalǵan taýarlar tikeleı nemese janama túrde Reseıdiń áskerı áleýetin kúsheıtýge kómektesýi múmkin.
«Osy sebeppen men búgin jáne erteń Ulybrıtanııa men AQSh-tan kelgen áriptesterimizben birge Qazaqstan Úkimetimen, Qazaqstan ókilderimen osy jaǵdaıdy qarastyryp, osyndaı saýda kólemderin tolyǵyraq talqylap, osy qos qoldanystaǵy nemese ozyq tehnologııaly taýarlar Reseıge baratynyn nemese barmaıtynyn anyqtap, ondaı jaıttar rastalsa, ony qalaı sheshemiz degen dıalog quramyz. Aıta keterim, bul sanktsııalar aldaǵy ýaqytta áli de qoldanysta bolady. Tipti, aldaǵy birneshe aptada nemese birneshe aıda osy soǵys aıaqtalady dep elestetken kúnniń ózinde bizge sheshýge týra keletin kóptegen máseleler áli de bar. Demek, men aıtqan sanktsııalar bolashaqta da bolady», - dedi Devıd O'Sallıvan.