EO men BUU áıelder men balalarǵa qarsy zorlyqty shekteıtin baǵdarlamany iske qosty

NUR-SULTAN. QazAqparat – Eýropalyq odaq pen Birikken Ulttar uıymy áıelder men balalarǵa qarsy zorlyq-zombylyqty shekteýge baǵyttalǵan baǵdarlamany iske qosty. Sharaǵa QR Syrtqy ister mınıstri Muhtar Tileýberdi qatysty, dep habarlaıdy QazAqparat tilshisi.

«Pandemııanyń aýyr saldarynyń biri – búkil álemde áıelderge degen zorlyq-zombylyqtyń kóbeıýi. Sol sebepti «Spotlight» («Jaryq sáýlesi») bastamasynyń mańyzy óte zor. Bastamanyń Halyqaralyq adam quqyǵyn qorǵaý kúni qarsańynda jolǵa qoıylýynyń da máni bar. Qazaqstan Prezıdenti Qasym-Jomart Toqaev «Jaryq sáýlesi» bastamasyn aımaqtyq baǵdarlamasyn ulttyq jáne aımaqtyq deńgeıde júzege asyrýdy tapsyrdy. Pandemııa óziniń áleýmettik-ekonomıkalyq yqpalymen búkil álemdegi genderlik teńdik baǵytynda jetken progresterimizdiń bárine kedergi keltirdi. Alaıda Qazaqstanda bul baǵytta barynsha jumys júrgizilýde. Sonymen qatar bul bizdiń «Qazaqstan – 2050» strategııamyzdyń basym baǵyttarynyń biri. Qazaqstan genderlik teńdik pen eldiń saıası-áleýmettik ómirindegi áıelderdiń rólin bekemdeý baǵytynda álemdik standarttarǵa jetý úshin barynsha kúsh salyp jatyr. Osy jyldyń basynan bastap áıelder men balalarǵa jynystyq qylmys jasaǵandarǵa qylmystyq jaýapkershilik kúsheıtildi», - dedi Muhtar Tileýberdi.

Mınıstr sonymen qatar qazirgi ýaqytta Qazaqstannyń Parlamenti turmystyq zorlyq-zombylyqqa qarsy kúres ınstıtýtyn bekemdeý jónindegi zań jobasyn ázirlep jatqanyn aıtyp ótti.

«Qazaqstan aldaǵy ýaqytta da teńdikke tór berý, áıelderdiń shettetilýine qarsy turý, turmystyq zorlyq-zombylyqty azaıtý baǵytyna ózi qabyldaǵan halyqaralyq mindettemelerdi oryndaıdy», - dedi Muhtar Tileýberdi.