EO elderi týrısterge qatysty erejelerdi ózgertip jatyr
Eýropaǵa baratyn týrıster qandaı bir elge barý úshin udaıy ózgerip otyratyn erejelerdi baqylap otyrýy qajet. Germanııa jeksenbiden bastap ekpeni tolyǵymen almaǵan týrısterden koronavırýsqa testileýdiń teris nátıjesi men jaqynda aýyrǵany týraly anyqtama talap ete bastady. Bul on eki jastan asqan barlyq adamǵa, sonymen qatar elge avtokólikpen kelýshilerge de qatysty.
Berlınde tamyzdyń alǵashqy kúnderi júzdegen demonstrant sanıtarııa shekteýleri men vaktsınalaýǵa qarsy narazylyq aktsııasyna qatysty. Ony ótkizýge úkimet ruqsat bermegen. Keıbir adamdardyń qolynda «Erkindik», «Korona - dıktatýraǵa jol joq» degen jazýy bar plakattar boldy. Demonstranttar toby polıtsııamen qaqtyǵysty. Nátıjesinde tártip saqshylary birneshe adamdy ustady.
Danııa shekteý sharalaryn jeńildetip jatyr. 500-den joǵary orny bar teatrlar men kınoteatrlarǵa barý úshin endi «densaýlyq pasporty» talap etilmeıdi.
Portýgalııada birinshi tamyzdan bastap epıdemıologııalyq ahýaldyń nasharlaýyna baılanysty keıbir aýdandarda engizilgen komendant saǵaty alynyp tastaldy. Dúkenderge, meıramhanalar men barlarǵa túngi ekige deıin jumys isteýge ruqsat etildi.
Frantsııanyń Marsel qalasynda «Orandj Velodrom» stadıonyna otyz myńǵa jýyq kórermen qaıta oraldy. Munda «Olımpık Marsel – Vılıarreal» joldastyq matchy ótti.