EO áýe kompanııalaryna qazan aıynyń sońyna deıin Lıvan men Izraıldiń ústinen ushpaýǵa keńes berdi

<p>ASTANA. KAZINFORM &ndash; Eýropa avıatsııalyq qaýipsizdik agenttigi aımaqtaǵy jaǵdaıdyń nasharlaýyna baılanysty áýe kompanııalaryn bir aı boıy Lıvan men Izraıldiń ústinen ushýdan aýlaq bolýǵa shaqyrdy, dep habarlaıdy <a href="https://ru.euronews.com/" target="_blank" rel="noopener">Euronews.</a></p>

Eýropalyq Odaq áýe shabýyldary men zymyrandyq shabýyldardyń kóbeıýine baılanysty áýe kompanııalaryna kelesi aı sońyna deıin (31 qazanǵa deıin) Lıvan men Izraıldiń áýe keńistiginen aýlaq bolýǵa keńes berdi.

Eýropalyq avıatsııalyq qaýipsizdik agenttigi málimdemesinde agenttik pen Eýrokomıssııanyń Izraıl men Lıvandaǵy «Hezbolla» qozǵalysy arasyndaǵy qaqtyǵystyń sońǵy ýaqytta órshýin eskere otyryp, Taıaý Shyǵystaǵy jaǵdaıdy muqııat qadaǵalap, onyń azamattyq avıatsııaǵa áserin baǵalaıtynyn aıtty.

Senbi kúni Izraıl Beırýttaǵy áýe dıspetcherlerine ushaq qonǵan jaǵdaıda «kúsh qoldanady» dep eskertken soń, Lıvannyń kólik mınıstrligi ırandyq ushaqtyń eldiń áýe keńistigine kirýine tyıym saldy.

Vengrııanyń Wizz Air áýe kompanııasy senbi kúni Izraılge 48 saǵatqa barlyq reısterdi toqtatqanyn habarlady.

Birneshe iri eýropalyq áýe kompanııalary, sonyń ishinde Air France, Lufthansa jáne British Airways Tel-Avıv pen Beırýtqa reısterdi toqtatqanyn habarlady.

Eske salaıyq, Izraıldiń elge jappaı áýe shabýyldary men Lıvannyń áskerılendirilgen «Hezbolla» tobynyń jaýap soqqylarynan keıin aımaqtaǵy shıelenis kúsheıip jatqandyqtan, álemniń kóptegen elderi, sonyń ishinde Qazaqstan da óz azamattaryn Lıvannan evakýatsııalaýdy usynyp otyr.

Buǵan deıin Izraıl armııasy Hezbolla jetekshisi Hasan Nasrallanyń qaıtys bolǵanyn habarlaǵan bolatyn.

«Hezbolla» óz jetekshisi Hasan Nasrallanyń qaza bolǵanyn rastady.

Izraıldiń Beırýtke jasaǵan shabýylynan Hasan Nasrallamen qatar IRSK basshysy qaza boldy.