EO 2024 jyly gadjetterge qýat berý qurylǵysynyń biryńǵaı standartyn qabyldaıdy

NUR-SULTAN. QazAqparat - Eýropalyq Odaq mobıldik telefondarǵa qosylatyn qurylǵylardyń biryńǵaı standartyn qoldaný týraly sheshim qabyldady. 2024 jyldyń kúzine qaraı zarıadtaý quylǵylary, qulaqqap, kolonka, kameralar USB-C formatta bolýy tıis, dep habarlaıdy QazAqparat Euronews saıtyna silteme jasap.

Brıýsselde mundaı qadamnyń paıdalanýshy úshin yńǵaıly bolyp, shyǵyndy azaıtý úshin ǵana emes, ekologııa úshin de qajet ekenin aıtyp otyr.

«Jańa ereje jylyna bir myń tonnadan astam elektrondy qaldyqtardy azaıtady. Elestete alasyz ba, jalǵyz zań ǵana. Sondaı-aq, bul CO2 qaldyqtaryn aıtarlyqtaı azaıtady. Bul 10 mln cmartfon nemese 2600 tonna shıkizatqa teń. Búginde shıkizat burynǵydan da qundy ekenin bilesizder», - dedi Eýroodaqtyń ishki naryq jónindegi komıssary Terrı Breton.

Bul sheshimniń eń úlken qarsylasy bolǵan Apple kompanııasy «Aıfon» qurylǵylaryna menshikti Lightning qosqyshyn paıdalanýda. Eýropa naryǵyna endi odan bas tartýǵa týra kelip otyr.

Apple kompanııasynyń pikirinshe, Brıýsseldiń bul sheshimi salanyń damýy men ınnovatsııalardy engizýdi tejeıdi. Basqa synshylar bolsa, eýropalyq standarttyń tez tanymal bola bastaǵan symsyz zarıadtaý qurylǵylaryna esh qatysy joq ekenin aıtýda.

Jańa ereje uıaly telefondar, planshetter, qulaqqaptar, jyljymaly oıyn qurylǵylary, portatıvti dınamıkterge qatysty engiziledi. Noýtbýk óndirýshileri úshin jańa erejeler kúshine engennen keıin óndiristi beıimdeý úshin 40 aı ýaqyt beriledi, dep jazady BBC News.

Sonymen qatar, jańa qujat satyp alýshylarǵa qurylǵyny zarıadtaý qurylǵysymen nemese onsyz satyp alýyn tańdaý quqyǵyn berýi kerek.

«Bul zań EO-nyń ónimderdi turaqty etý, elektrondy qaldyqtardy azaıtý jáne tutynýshylardyń ómirin jeńildetý jónindegi jalpy kúsh-jigeriniń bir bóligi», - delingen Eýroparlament málimdemesinde.

Parlamentarıılerdiń baǵalaýynsha, bul tutynýshylarǵa zarıadtaǵyshtardy satyp alýdan jylyna 250 mıllıon eýroǵa deıin únemdeýge kómektesip, qaldyq kólemin jylyna 11 myń tonnaǵa qysqartady.