Enterovırýs ınfektsııasynyń taralýy 1,5 ese ósti

ASTANA. QazAqparat – Enterovırýs ınfektsııasyn kóbine 14 jasqa deıingi balalar juqtyrǵan. Bul týraly Densaýlyq saqtaý vıtse-mınıstri – Bas memlekettik sanıtarııalyq dáriger Aıjan Esmaǵambetova aıtty, dep habarlaıdy QazAqparat tilshisi.

«Serozdy menıngıt – enterovırýstardan, sondaı-aq vırýstyń keıbir basqa túrlerinen bolady. Vırýs sý, kókónister, jemister, tamaq ónimderinen jáne qoldy jýmaý saldarynan taralady. Infektsııa kóbinese sý aıdyndary men basseınderde shomylý kezinde paıda bolady. Bıyl enterovırýs ınfektsııasynyń 1 220 jaǵdaıy tirkeldi, byltyrdyń osyǵan uqsas kezeńimen salystyrǵanda syrqattaný 1,5 ese ósti. Aýyrǵandardyń 80 paıyzy 14 jasqa deıingi balalar. Aýrýdyń kóp tirkelýi mamyr-maýsym aılarynda Astana, Almaty, Shymkent qalalarynda, Abaı jáne Qaraǵandy oblystarda tirkeldi. Qazirgi ýaqytta aýrý juqtyrý derekteriniń tómendeýi baıqalyp otyr», - dedi dedi A. Esmaǵambetova Ortalyq kommýnıkatsııalar qyzmetindegi baspasóz máslıhatynda.

Onyń aıtýynşa, jyl saıyn aýrýdyń taralýy qyrkúıek aıyna deıin tirkeledi.

Sondyqtan tıisti talaptardy saqtaý qajet: tek resmı ruqsat etilgen jerlerde shomylyp, sýdy jutyp qoımaýǵa tyrysý kerek. Sonymen qatar, tek qaınatylǵan nemese bótelkedegi sýdy paıdalaný mańyzdy. Jemister men kókónisterdi jaqsylap jýyp otyrý qajet», - dedi vıtse-mınıstr.