Eńseń túspesin, Alashym: Ibragım Eskendir #Birgemiz aktsııasyn ánmen árledi
«Qıyn-qystaý zamanda, ne bolmaǵan bul dalamda» dep bastalatyn án arqyly ánshi aktsııaǵa ún qosyp otyr.
«Eńseń túspesin, Alashym! Tar jol, taıǵaq keshken elmiz ǵoı, syn-saǵatta birlikte bolaıyq. Alla elimizge kelgen indetten aman-saý ótýimizdi násip etsin! Birgemiz, qazaǵym», - dep jazdy ánshi Instagram paraqshasynda.
Aıta ketsek, syn saǵatta qoldan kelgen kómegin aıamaǵan elimizdegi kásipkerler men volonterler #Birgemiz úndeýine atsalysýda.
Máselen Batys Qazaqstan oblysy, Jastar saıasaty jónindegi basqarma janynan qurylǵan «Aq jaıyq jastary» volonterlik qozǵalysy Memleket basshysy elimizde tótenshe jaǵdaı jarııalaǵannan keıin halyqtyń kómekke muqtaj tobyna kómektesý týraly sheshim qabyldaǵan.
Al Óskemen qalasyndaǵy volonterler qarttar men múmkindigi shekteýli jandarǵa azyq-túlik pen dári-dármek jetkizýmen aınalysýda.
Al Qostanaı oblysynda Amangeldi aýdany ortalyǵyndaǵy 3 mekteptiń 1981 jylǵy túlekteri az ýaqyt ishinde aýdandaǵy 7 otbasyǵa jaqsylyq jasady. Olar qaıyrymdylyq estafetasyn Amangeldi aýdanynyń 1980 jyly týylǵan túlekterine joldap, saýapty shara jalǵasyn tapty.
Al Aqmola oblysynyń jastary koronavırýs ınfektsııasy taralýynyń aldyn alý maqsatynda jańa chellendj bastap ketti.
Túrkistan oblysynyń eriktileri óńirde saqtyq sharalaryn júrgizýge qolǵabys etýde. Tólebı aýdanyndaǵy medıtsına kolledjiniń volonterleri 100 dana medıtsınalyq maskany qoldan tigip, kópbalaly otbasylarǵa berýde.
Jastar sondaı-aq, qoǵamdyq oryndarda arnaıy daıyndalǵan jadynama taratyp júr. Sonymen qatar, túsindirý jumystarymen de aınalysady.