Eńsebaevtar áýleti qandaı eńbek jolynan ótti

NUR-SULTAN. QazAqparat – Qyrkúıek aıynyń sońǵy jeksenbisi – Eńbek kúni. Jyl saıyn elimizde eńbekqor qazaqstandyqtardy anyqtaıtyn «Eńbek joly» baıqaýy ótedi. Ótken jyly «Úzdik eńbek áýleti» nomınatsııasynda elordalyq Eńsebaevtar áýleti birinshi oryn alǵan edi. Áýlettiń eńbek ótili 600 jyldy quraıdy. Bul áýlettiń barlyq múshesi temirjol salasynda jumys isteıdi. Mereke kúni qarsańynda QazAqparat tilshisi ákesi Kókenaı Eńsebaevtyń eńbek jolyn jalǵastyrǵan Roza Dúısenbekovamen áńgimelesken bolatyn.

Kókenaı Eńsebaev 1927 jyly týǵan. Ol eńbek jolyn 1942 jyly Aıagóz stantsııasynyń temirjol vagondary ýchaskesiniń qosalqy tsehynda qara jumysshy bolyp bastaǵan. Almaty qalasynda arnaıy kýrsty oqyp alǵannan keıin dóńgelek tsehynda sheber bolyp jumys isteıdi. 1972 jyly ol VChD-11 mekeme basshysynyń orynbasary bolyp taǵaıyndalady. 1972-1992 jyldar aralyǵynda ol VChD-8 deposy jergilikti komıtetiniń tóraǵasy bolyp qyzmet etip, 1992 jyly zeınetkerlikke shyqqan. Onyń jalpy jumys ótili – 50 jyl.

Kókenaı aqsaqaldyń qyzy Rozanyń aıtýynsha, ákesi etken eńbegi úshin túrli medal, maqtaý qaǵazymen marapattalǵan. Sonyń qatarynda «Temirjol kóligi sotsıalıstik jarysynyń úzdigi» tósbelgisimen, «Eren eńbegi úshin» medalimen marapattalǵan. Oǵan qazaq temirjolyndaǵy mamandyq boıynsha qurmetti temirjolshy ataǵy berilgen.

Qazir marqum Kókenaı aqsaqaldyń jolyn onyń ul-qyzdary, kúıeý balalary men nemereleri jalǵastyryp kele jatyr. Áýlettiń 20 múshesi osy salada jumys isteıdi. Roza Kókenaıqyzy – Kókenaı Eńsebaevtyń úlkeni. Ol mektep bitire salysymen atalǵan vagon deposynda kranshy bolyp jumys istegen.

«Men temirjol tehnıkýmyna oqýǵa túsip, maılaýshy, brıgadır, odan keıin vagon qurastyrý tsehynda sheber bolyp jumys istedim. Zeınetkerlikke shyqqanǵa deıin avtobaqylaý pýnktinde sheber boldym. Eńbek jolymda alǵys hattarmen, maqtaý qaǵazdary jáne tósbelgilermen marapattaldym, - deıdi ol.

Roza Kókenaıqyzy ákesi meıirimdi, qaıyrymdy, kómek suraǵan adamǵa qol ushyn sozýǵa daıyn turatyn adam bolǵanyn aıtady.

«Ákemizdiń erinbeı eńbek etkenin kórip óstik. Bizge onyń qandaı jumys isteıtini qyzyq bolatyn, bul qyzyǵýshylyqtyń áserinen osy mamandyqqa boı urdyq. Ákemiz bastaǵan joldy osylaısha jalǵastyryp kettik. Ákem bárimen ortaq til tabysa biletin jan edi. Onyń ómirden ozǵanyna 25 jyl ótip ketse de, zamandastary áli de eske alady. Tańnyń atysymen jumysqa ketip, jospar oryndalǵanyna kóz jetkizip baryp, kún batqan kezde úıge qaıtatyn», - deıdi ol.

«2016 jyly Shyǵys Qazaqstan oblysynda ótken baıqaýǵa qatysyp, 2-oryn aldyq. 2017 jyly Óskemende ótken baıqaýda 1-oryn enshiledik. Osylaısha respýblıkalyq «Eńbek joly» baıqaýyna qatysýǵa múmkindik aldyq. 2019 jyly sol baıqaýǵa qatysyp, 1-oryndy ıelendik. Baıqaý barysynda áýletimizdiń eńbek joly ákemizden bastap balalary, nemerelerine deıin qalaı jalǵasqany týraly vıdeorolık kórsettik. Biz ákemizdiń jolyn jalǵastyra túskimiz keledi. Áýletimizdiń aty osy temirjol salasymen baılanysty bola bergenin, ákemizdiń aty eldiń jadynda qala bergenin qalaımyz», - deıdi Roza Kókenaıqyzy.