Energııamen jabdyqtaýshy uıymdar «MAEK – Qazatomónerkásip» JShS-na 6,1 mlrd teńge qaryz
«Elektr energııasynyń bólshek saýda naryǵyn uıymdastyrý jáne osy naryqta jumys isteý, qyzmet kórsetý qaǵıdalaryna sáıkes bólshek saýda naryǵynda elektr qýatyn satyp alý jáne satý energııamen jabdyqtaýshy uıymdar arqyly júzege asyrylady. Aqtaý qalasy, Munaıly aýdany jáne Jańaózen qalasynyń tutynýshylaryn elektr energııasymen jabdyqtaý fýnktsııasyn «AllianceEnergoSnab-Aqtaý» JShS jáne «Elektr júıeleri» JShS atqarady.
«AllianceEnergoSnab-Aqtaý» JShS men «Elektr júıeleri» JShS óz qyzmetterin bastaǵannan beri alynǵan energııa resýrstary úshin «MAEK-Qazatomónerkásip» JShS aldyndaǵy bereshegi óse bastady. Qaryz búgingi kúnge deıin eselep ósýde», delingen habarlamada.
1968 jyldan bastap MAEK oblys ortalyǵy - Aqtaý qalasynyń turǵyndary, Mańǵystaý oblysynyń óndiristik jáne áleýmettik mańyzy bar obektileri úshin elektr energııasyn, aýyz sýdy, tehnıkalyq, ystyq sý men jylýdy úzdiksiz óndirý tsıkli bar óńirdegi jalǵyz kásiporyn.
Bul rette tutynýshylar kóterme (1 MVt-tan joǵary tutynýshylar) jáne bólshek (1 MVt-qa deıin tutynýshylar)bolyp eki sanatqa bólinedi. Kásiporyn ónim óndirý úshin negizgi resýrs retinde «QazTransGaz Aımaq» AQ-nan satyp alynatyn gazdy paıdalanady.
Úsh jyl ishinde «AllianceEnergoSnab-Aqtaý» JShS men «Elektr júıeleri» JShS-nyń MAEK aldyndaǵy merzimi ótken jalpy debıtorlyq bereshegi 5,6 mlrd teńgeden asty.
«MAEK-Qazatomónerkásip» JShS óz tarapynan paıda bolǵan bereshekti talap etý boıynsha barlyq yqtımal zańdy sharalardy jasady, biraq bul sharalar nátıje bermedi. Kombınat energııa resýrstaryn boryshker kompanııalarǵa berýge shekteý qoıa almaıdy, óıtkeni aldymenen turǵyndardyń muqtajdyǵy eskeriledi, sonymen birge elektr energııasynyń tapshylyǵy aýrýhanalardyń, ambýlatorııalardyń, statsıonarlardyń jáne basqa da áleýmettik mańyzy bar obektilerdiń úzdiksiz jumys isteýine de teris áser etýi múmkin. Sondaı-aq, «AllianceEnergoSnab-Aqtaý» JShS men «Elektr júıeleri» JShS qatysty sot-atqarý sharalary da tıisti nátıje bermedi», delingen habarlamada.
Kompanııa aı saıyn «QazTransGaz Aımaq» AQ aldyndaǵy aǵymdaǵy bereshegin tóleıdi, ol 3 mlrd teńgeden astam soma. «MAEK-Qazatomónerkásip» JShS óz ónimin óndirý úshin gaz jetkizýdiń úzdiksizdigin qamtamasyz etý maqsatynda Ekinshi deńgeıdegi bankterden nesıe alýǵa jáne óz qarajaty esebinen banktiń paıyzdyq mólsherlemesin tóleý boıynsha aýyrtpalyqty kóterýge májbúr.
Energetıka kompanııasynyń málimdeýinshe, qazirgi ýaqytta bankterdegi nesıe lımıti taýsyldy, kompanııa aı saıynǵy debıtorlyq bereshektiń ósýine baılanysty úlken shyǵyndarǵa ushyraýda. Bul jaǵdaı óndiriske, jabdyqtardy jańartýǵa, kásiporynnyń turaqty jumysyna jáne «MAEK-Qazatomónerkásip» JShS úsh myń ujym músheleri aldyndaǵy eńbek mindettemelerin saqtaýǵa teris áser etedi.
MAEK basshylyǵy óz ónimderin satýdan alynǵan barlyq aqshalaı qarajatty tutynylǵan otyn gazy úshin bereshekti, kredıtorlar aldyndaǵy tólemderdiń merzimin ótkizip alǵany úshin ósimpuldardy jáne bankter aldyndaǵy paıyzdardy óteýge jiberýge májbúr.
«MAEK-Qazatomónerkásip» kompanııasynyń málimdeýinshe, joǵaryda baıandalǵannyń negizinde jáne úzdiksiz ósip kele jatqan debıtorlyq bereshektiń saldarynan jaǵymsyz saldarlarǵa jol bermeý maqsatynda «MAEK-Qazatomónerkásip» JShS 1 qyrkúıekten bastap «AllianceEnergoSnab-Aqtaý» JShS jáne «Elektr júıeleri» JShS-men barlyq ózara sharttyq qarym-qatynastardy buzýǵa májbúr. Olarmen shartty buzý halyqqa elektr energııasyn jetkizýde irkilisterge ákelmeıdi. Basqa energııamen jabdyqtaýshy kompanııalarmen sharttar jasalatyn bolady, bul rette «MAEK-Qazatomónerkásip» JShS olarǵa boryshker kompanııalardyń jumystan bosatylǵan qyzmetkerlerin jumysqa ornalastyrýdy usynady.
«Aqtaý jáne Jańaózen qalalarynyń, sondaı-aq Munaıly aýdanynyń turǵyndaryn kásiporynnyń amalsyz qoldanǵan sharalaryna túsinistikpen qaraýdy ótinemiz. Bul sharalar qabyldanbaǵan jaǵdaıda, kombınattyń jınaqtalǵan bereshegi, saıyp kelgende, halyqtyń qajettilikteri úshin elektr energııasyn, aýyz sýdy, tehnıkalyq, ystyq sý men jylýdy óndiretin jalǵyz kásiporynnyń toqtap qalýyna ákelýi múmkin. Bul jaǵdaıda Mańǵystaý oblysy turǵyndarynyń tynys tirshiligi men densaýlyǵyna úlken qaýip tónetindigi sózsiz», delingen habarlamada.