Energııaǵa tarıftiń qymbattaýynan taýardyń baǵasy artady – sarapshy

NUR-SULTAN. QazAqparat - 1 shildeden bastap elektr energııasy baǵasynyń qymbattaýy energetıkalyq qaýipsizdikti saqtaýǵa múmkindik beretin shara. Mundaı pikirdi «Samuryq-Energo» AQ basqarma múshesi - qarjy jónindegi basqarýshy dırektory Aıdar Rysqulov bildirdi, dep habarlaıdy QazAqparat tilshisi.

Onyń atap ótýinshe, elektr energııasyna tarıftiń artýyna negizgi sebep - energııany óndirýdiń ózindik qunynyń osy kúnge deıin bekitilgen shekti tarıften tómen bolyp kelýi. Qazirgi ýaqytta energııanyń ózindik quny 9 teńge bolsa, tarıf 7,7 teńge mólsherinde bekitilgen. Mundaı jaıttyń oryn alýyna elektr energııasyn tutyný kóleminiń jyldan-jylǵa artýy, soǵan oraı mazýt pen kómir tasymaly qunynyń qymbattaýy sebep bolyp otyr.

«Tarıftiń artýy barlyq stansalardyń jumys jaǵdaıyna septigin tıgizedi. Stansalardyń toza bastaýy únemi ınvestıtsııa salýdy qajet etedi. Osy rette tarıftiń kóterilýi barlyq stansalardyń jumys istep turýyna septigin tıgizedi. Bul sharalar energııalyq qaýipsizdikti saqtaýǵa, stansalardyń jospardan tys jóndeý jumystaryna toqtap qalmaýyna septigin tıgizedi. Sondyqtan tarıfti kóterýden jaltara almaımyz. Tolyqtaı aıtsa, bul - Qazaqstannyń energetıkalyq qaýipsizdigi máselesi», - dedi Aıdar Rysqulov.

Sonymen qatar ol elektr energııasy baǵasynyń kóterilýi dál osy qyzmet túrin tutynatyn kásiporyndar shyǵaratyn sońǵy ónim baǵasyna da áser etýi múmkin ekendigin joqqa shyǵarmady.

«Qazaqstanda elektr energııasyn tutyný ózge de sońǵy ónimderdiń ózindik qunynyń artýyna alyp keledi. Óıtkeni, elektr energııasynsyz qandaı da bir ónim shyǵarý múmkin emes. Elektr energııasynyń quny naqty ónimniń ózindik qunyna da tikeleı áser etedi. Bir jaǵynan alyp qaraǵanda, tarıftiń qymbattaýy energııany únemdeýge de septigin tıgizedi dep sanaımyz. ıAǵnı, adamdar elektr energııasyn únemdeýge daǵdylanady», - dedi ol.

Buǵan deın habarlaǵanymyzdaı, 1 shildeden bastap Qazaqstanda elektr energııasy qymbattaıdy.