Energııa únemdeý salasynda BUU Damý baǵdarlamasynyń úsh jobasy iske asady

ASTANA. QazAqparat – Birikken Ulttar Uıymynyń damý baǵdarlamasy arqyly elimizde energııany únemdeý salasynda birneshe joba júzege asqaly jatyr. Bul týraly QR Indýstrııa jáne ınfraqurylymdyq damý vıtse-mınıstri Marat Qarabaev málim etti, dep habarlaıdy QazAqparat tilshisi.

«Elimizde energııa únemdeý jáne onyń tıimdiligin arttyrý máselesin sheshý men salany ilgeriletýde halyqaralyq uıymdardyń belsendiligin erekshe atap ótkim keledi. Búgingi tańda BUU Damý baǵdarlamasymen (energııany tıimdi jaryqtandyrýdy ilgeriletý) jáne Dúnıejúzilik bankimen (Qazaqstanda energııa tıimdiligin arttyrý) 25 mln AQSh dollar somasyna 2 joba iske asty. Odan basqa BUU Damý baǵdarlamasy arqyly 17,7 mln AQSh dollarǵa taǵy 3 joba iske asý satysynda», - dedi Marat Qarabaev elordada ótip jatqan IV halyqaralyq energııa únemdeý forýmynda.

Sondaı-aq, vıtse-mınıstr joǵaryda atalǵan úsh jobaǵa jeke toqtalyp ótti.

«Tómen kómirtekti damytýǵa arnalǵan turaqty qalalar» jobasynyń quny - 5,9 mln AQSh dollary. Elimizde energııa tıimdiligine ınvestor tartý úshin jaǵdaı jasaý jobasyna 8,3 mln dollar qaralǵan. Sol sııaqty Qazaqstanda elektr turmystyq qural-jabdyqtardyń energııa tıimdiligin standarttaý, sertıfıkattaý jáne tańbalaý salasy boıynsha 3,5 mln dollardyń jobasy iske asady», - deıdi ol.

Odan bólek, Marat Qarabaev bıyl Eýropalyq Odaq jáne Germanııa úkimetiniń qoldaýymen energııa únemdeý salasynda taǵy birneshe jobanyń iske qosylatynyn aıtty.

Aıta keteıik, Astanada IV halyqaralyq energııa únemdeý forýmy ótip jatyr.

Atalǵan sharaǵa memlekettik quzyrly organdar ókilderi, otandyq jáne sheteldik energııa óndiretin uıym basshylary men sala mamandary qatysýda.