Energııa-servıstik kelisimshart jobasy 5 mlrd teńge únemdeýge múmkindik beredi

NUR-SULTAN. QazAqparat – Energııa-servıstik kelisimshrat jobasy 5 mlrd teńgege deıin qarajatty únemdeýge múmkindik beredi. Bul týraly QR Indýstrııa jáne ınfraqurylymdyq damý vıtse-mınıstri Amanııaz Erjanov aıtty, dep habarlaıdy QazAqparat tilshisi.

«Búgingi kúni energııa únemdeý kartasy aıasynda 117 joba, onyń ishinde 56 mlrd teńgeden astam somaǵa memlekettik-jekeshelik áriptestiktiń energııa-servıstik kelisimshart tetikteri arqyly 58 joba júzege asyrylyp jatyr. Kútiletin únem somasy 4,8 mlrd teńgeni quraıdy. Otandyq kompanııada iri ónerkásiptik nysanǵa arnalǵan eń úlken energııa-servıstik kelisimshartty atap ótsem, ol 747 mln teńgege Aqsý ferroqorytpa zaýytyn jaryqtandyrýdy jańǵyrtý boldy», - dedi vıtse-mınıstr ІІ halyqaralyq energııa únemdeý forýmynda.

Onyń atap ótýinshe, kompanııanyń jyldyq únemi 349 mln teńgeni qurady jáne joba 2 jyldyń ishinde tolyǵymen aqtaldy.

«Bıýdjettik uıymdarǵa qatysty aıtar bolsam, energııa-servıstik kelisimshart tetikteri arqyly jobalardy júzege asyrý qoldanystaǵy zańnamada kózdelmegen. Osyǵan baılanysty jumys istep turǵan energııa-servıstik kompanııalar memleket bekitken satyp alýlar protsedýralaryna qatysa almaıdy. Al bıýdjettik sektordyń olardyń qyzmetterine tólem jasaý múmkinshiligi joq. Bul problemany sheshý joly memlekettik-jekeshelik áriptestiktiń servıstik kelisimshartyn jasasý bolyp otyr. Qazirgi ýaqytta otandyq ınvestorlarmen memlekettik-jekeshelik áriptestik aıasynda energııa-servıstik kelisimsharttar engizý jumystary qarqyndy júrgizilip jatyr. Jobalar júzege asyrylý ústinde», - dedi Amanııaz Erjanov.