Energııa óndirý sektory úshin tarıfterdi esepteý ádistemesin ózgertý qajet

ASTANA. QazAqparat -  Elordada elimizdiń Elektr energetıkalyq qaýymdastyǵynyń uıymdastyrýymen «Qazaqstannyń elektr energetıkalyq salasynyń uzaq merzimdi damý strategııasy» taqyrybynda energetıkalyq forým ótýde, dep habarlaıdy QazAqparat tilshisi.

Qazaqstannyń Elektr energetıkalyq qaýymdastyǵy Dırektorlar keńesiniń tóraǵasy Jomart Kósherbaevtyń aıtýynsha, energııa óndirý sektorynda oryn alyp otyrǵan obektıvti problemalar  energııa óndirýshi kompanııalar qyzmetin aıqyndaıtyn zańnamalyq jáne normatıvtik aktilerdiń kemshilikteri saldarynan tereńdeı túsýde. Tarıf  qurylymdaý tetikteriniń jetildirilmeýinen salany jańǵyrtýǵa, esepke alý quraldary men ózge de qural-jabdyqtardy jańartýǵa ınvestıtsııa salý múmkinshiligi shektelip otyr.

«Energııa óndirý sektory úshin tarıfterdi esepteý ádistemesi jyldyń sońynda alynǵan kiristi tarıfti tómendetýge, al shyǵyndy kelesi kezeńde qaıtarýdy kózdeıdi. Osylaısha, dál osy ádisteme kiris alý maqsatynda kásiporyn qyzmetin uıymdastyrýdy kózdeıtin kásipkerliktiń negizgi prıntsıpterin buzady. Básekelestik prıntsıpiniń ózi de buzylyp otyr. Sondyqtan qazirgi ýaqytta bólshek naryqta bıznesti tartý úshin qolaıly orta qurý qıyn», - dedi ol.

Forýmǵa qatysýshylar, elektr energetıkasyn ınnovatsııalyq damytý, energııa óndirýshi uıymdardy, energııa taratýshy kompanııalardy irilendirý, jylýmen qamtamasyz etý, jańartylatyn qýat kózderi syndy ózekti máselelerdi talqylaýda.