Energetıkalyq jáne kommýnaldyq sektordy jańǵyrtý: Oljas Bektenov keńes ótkizdi

<p>ASTANA. KAZINFORM &ndash; Premer-mınıstr Oljas Bektenov Memleket basshysynyń elimizdiń turǵyn úı-kommýnaldyq sharýashylyǵyn jańǵyrtý jónindegi tapsyrmasynyń oryndalýy boıynsha keńes ótkizdi.&nbsp;Bul týraly Úkimettiń baspasóz qyzmeti habarlady.</p>

«Energetıkalyq jáne kommýnaldyq sektorlardy jańǵyrtý» ulttyq jobasy ınjenerlik jelilerdiń apatty men tozý deńgeıin tómendetýge, kommýnaldyq qyzmetterdiń sapasy men senimdiligin arttyrýǵa baǵyttalǵan. Elektr energııasyn óndirý úshin 5 259 MVT-qa deıin jańa qýattardy iske qosý boıynsha 15 jobany iske asyrý, sondaı-aq jumys istep turǵan 14 nysandy jóndeý jáne rekonstrýktsııalaý josparlanyp otyr. Júrgizilgen jumystar nátıjesi boıynsha qýattylyq 7,3 GVt-qa artady dep boljanyp otyr. Qoldanystaǵy aktıvterdi jańartý tozýdyń orta eseppen 15%-ǵa tómendeýine ákeledi. Jańǵyrtý barysynda 86 myń shaqyrym kommýnaldyq jelilerdi qamtý josparlanyp otyr.

Premer-mınıstrdiń orynbasary Qanat Bozymbaev energetıkalyq jáne kommýnaldyq sektorlardaǵy ózekti máseleler respýblıka boıynsha jóndeý qýatyn arttyrý jáne jelilerdiń tozý deńgeıi 65-70%-dan asatyn óńirlerge basa nazar aýdarý arqyly sheshiletinin baıandady.

Tozý deńgeıin tómendetý boıynsha: jylýmen jabdyqtaýda – 53%-dan 40%-ǵa deıin, elektrmen jabdyqtaýda – 62%-dan 45%-ǵa deıin, sýmen jabdyqtaýda – 39%-dan 34%-ǵa deıin, sý burýda – 54%-dan 40%-ǵa deıin josparly kórsetkishter qarastyrylǵan. 2029 jylǵa deıin bul maqsattarǵa 6,8 trln teńge baǵyttalady. Qarjy jumsalýynyń ashyqtyǵyn qamtamasyz etý úshin tsıfrlyq teńgeni paıdalaný máselesi talqylandy.

Premer-mınıstr Oljas Bektenov ázirlengen Ulttyq jobanyń elimizdiń turǵyn úı-kommýnaldyq sektory úshin jáne otandyq taýar óndirýshilerdi qoldaýdy jáne memlekettik satyp alýlardaǵy qazaqstandyq qamtý úlesin arttyra otyryp, tutastaı alǵanda ekonomıkany damytýdaǵy mańyzdylyǵy atap ótti.

Ulttyq jobada ımportqa táýeldilikti tómendetý jáne jańa jumys oryndaryn ashý úshin otandyq ónerkásipti qoldaýǵa erekshe nazar aýdaryldy. Ekonomıkanyń aralas salalaryn, sonyń ishinde metallýrgııany, óńdeý ónerkásibin jáne basqa da salany damytýdy yntalandyratyn 27 jańa óndiris salý josparlanýda.

- Ómirlik mańyzdy sektorlar – jylýdyń, energııanyń jáne sýmen jabdyqtaýdyń úzdiksiz jumys isteýin qamtamasyz etý Úkimettiń birinshi kezektegi mindeti sanalady. Ulttyq jobany oryndaý tozǵan, keıbir jerlerde apatty jaǵdaıdaǵy ınfraqurylymdy aýqymdy jańartýǵa múmkindik beredi. Barlyq jobalar 3,5 myń jumys ornyn ashýdy kózdeıdi. Bizge otandyq bıznesti barynsha tartyp, otandyq taýarlar men qyzmetterdi satyp alý qajet, - dep atap ótti Oljas Bektenov.

Premer-mınıstr Ulttyq ekonomıka mınıstrligine múddeli memlekettik organdarmen jáne uıymdarmen birlesip, Ulttyq joba bekitilgennen keıin onyń sapaly iske asyrylýyn qamtamasyz etýdi tapsyrdy. Ónerkásip jáne qurylys mınıstrliginiń aldyna TKSh ónimderin óndiretin otandyq kásiporyndardyń tolyq júktememen jumys isteýine jaǵdaı jasaý mindeti qoıyldy.

Ulttyq jobany iske asyrý josparlary týraly ónerkásip jáne qurylys mınıstri Qanat Sharlapaev, Energetıka vıtse-mınıstri Álibek Jamaýov, Ulttyq ekonomıka mınıstrligi Tabıǵı monopolııalardy retteý komıtetiniń tóraǵasy Asan Darbaev baıandady. Sondaı-aq Premer-mınıstrdiń orynbasary Tamara Dúısenova, Ulttyq bank tóraǵasy Tımýr Súleımenov te pikir bildirdi.

Keńes qorytyndysy boıynsha Energetıkalyq jáne kommýnaldyq sektorlardy jańǵyrtý jónindegi ulttyq joba tásilderi maquldandy.

Aıta keteıik, Premer-mınıstr Oljas Bektenov Ulttyq ekonomıka mınıstrligi ujymyna vedomstvonyń jańa basshysy Serik Jumanǵarındi tanystyrǵan bolatyn.