Energetıka jáne TKSh salasyndaǵy jemqorlyq úshin 20 sheneýnik sottaldy
Bul týraly brıfıngte Qazaqstan Respýblıkasy Sybaılas jemqorlyqqa qarsy is-qımyl agenttigi birinshi departamentiniń aǵa tergeýshisi Danııar Begaıdarov málimdedi.
«Energetıka jáne turǵyn úı-kommýnaldyq sharýashylyqty qoldaý úshin jyl saıyn bıýdjetten mıllıardtaǵan qarajat bólinedi. Degenmen, bul salanyń damýyna jemqorlyq faktileri únemi kedergi bolyp otyr. Statıstıkaǵa súıensek, 2019 jyly osy salada shamamen 104 qylmystyq is qozǵalǵan, onyń ishinde 91 qylmystyq isti sybaılas jemqorlyqqa qarsy qyzmettiń ózi tirkegen. 56 óndiris aıaqtalyp, onyń 49-y sotqa joldandy. Atalǵan qylmystyq ister boıynsha 20 laýazymdy tulǵa sottaldy. Tek 2019 jyly memleketke jasalǵan qylmystardan kelgen zalal 2,5 mıllıardtan astam teńgeni qurady. Qazirgi ýaqytta keltirilgen shyǵyn 100% óteldi», - deıdi Danııar Begaıdarov.
Onyń aıtýynsha, qazirgi ýaqytta aımaqtarda sybaılas jemqorlyqqa qatysty birqatar qylmystyq ister qaralýda. TKSh salasynda bul - negizinen para alý, qyzmetti asyra paıdalaný jáne atqarylǵan jumys aktilerine zańsyz qol qoıýǵa baılanysty urlyq túrindegi sybaılas jemqorlyq faktileri. Bul sý tazartý qurylystaryn kúrdeli jóndeýden ótkizý, sýmen jabdyqtaý júıesine tıisti jabdyqtardy ornatý, kóshelerdi jaryqtandyrý jáne kógaldandyrý, kólik quraldarynyń jyldamdyǵyn kúsheıtý úshin jabdyqty ornatý týraly aktiler.
Sondaı-aq, tender kezinde sybaılas jemqorlyq faktileri oryn alyp otyr. Úı alý kezegin jyljytýǵa baılanysty para alý faktileri, magıstraldyq jelilerdi, sýmen jabdyqtaý jáne sý tazartý qurylystaryn qalpyna keltirýge bólingen qarajatty urlaý faktileri de kezdesedi.
«2017 jyldan bastap 2019 jylǵa deıin sybaılas jemqorlyqqa qarsy qyzmet energetıka jáne turǵyn-úı kommýnaldyq sharýashylyq salasyndaǵy 300-den astam sotqa deıingi tergeýdi tirkedi. Onyń ishinde 288 qylmystyq is aıaqtaldy, 92% nemese 265 is sotqa joldandy, sonymen qatar 78 adam sottaldy», - deıdi ol.