Energetıka salasynda eńbek etsem deımin – Ámirjan Armandıev
-Ámirjan Arsenuly, halyqaralyq emtıhandy sátti tapsyrý arqyly UBT-ǵa qatyspaı-aq, sertıfıkatqa qol jetkizdiń, aldymen osy tabysyń jóninde aıta ketseń?
- Men mekteptegi sońǵy oqý jylym bastalar kezinde halyqaralyq testterdi jazýǵa tirkelgen bolatynmyn. Bul emtıhandarǵa qatysqan sebebim Nazarbaev ýnıversıtetine oqýǵa túsýdi maqsat etken edim. ıAǵnı 2019 jyldyń jeltoqsan aıynda SAT reasoning, SAT subject atty eki testtiń qorytyndylary qolymda boldy. Al osy jyly maýsym aıynda QR Bilim jáne ǵylym mınıstrliginiń sheshimimen SAT, ACT jáne IB halyqaralyq standarttalǵan testileýleriniń baldaryn Ulttyq biryńǵaı testileý (UBT) baldaryna aýystyrý shkalasy engizildi. Bul jańashyldyqty estigen kezde óz kórsetkishterimdi ulttyq testileý ortalyǵyna jiberip, UBT-ǵa bir kún qalǵan kezde 140 ball ıegeri atandym.
- «Tarydaı bop kiresiń, taýdaı bolyp shyǵasyń» degendeı, mektep qabyrǵasynda ótken jyldar nesimen este qaldy, ustazdaryń jóninde qandaı lebiz bildirer ediń?
-Meniń mekteptegi ýaqytym óte qyzyqty ótti dep oılaımyn. Sebebi, meniń synybymdaǵy oqýshylar arasynda jyly qarym-qatynas ornady. Óz synyptastarym ázilqoı, árqashan qoldap, óz oıymen bólisýge qysylmaıtyn jandar. Osy dostarymmen birge bastan keshken kóptegen qyzyqty oqıǵalar boldy, sol oqıǵalar mektepti eske alǵanda, oıyma túsedi. Mysal retinde 10 synyptyń kókteminde synyppen birge jáne fızıka muǵalimi Erjan Seıtjanulynyń bastaýymen Almaty, Nur-Sultan qalalaryndaǵy joǵarǵy oqý oryndarymen tanysý baǵytynda ótken 7 kúndik jol saparymyzdyń ózi jadymyzda óshpeıtindeı estelik bolyp qalǵanyn aıtar edim.
Al ustazdarǵa kelsek, aldymen óz alǵysymdy fızıka páninen sabaq bergen Aıgerim Myrzajanqyzy men Erjan Seıtjanulyna aıtamyn. Fızıka páninen olımpıadalarǵa qatysý barysynda qoldap, bilim bergenderi úshin raqmet. Sonymen qatar aǵylshyn tilinen emtıhandarǵa daıyndap, ýnıversıtetke tapsyrý barysynda aqyl-keńes berip, mektepte aqysyz kýrstardy ashqan Aıan Ramılulyna rızashylyǵymdy bildirgim keledi. Atap ótken SAT emtıhanynda eki ret matematıka pánin tapsyrǵan bolatynmyn, osy oraıda 7 synyptan bastap algebra men geometrııa páninen dáris bergen muǵalim Serik Mendibaıulyn da atap ótkim keledi. Jalpy alǵanda, mekteptegi barlyq ustazdaryma myń alǵys, sebebi osy tabysqa olardyń úlesinsiz jetpes edim.
- Aldaǵy ýaqytta qandaı mamandyqty meńgermekshisiń, basty arman-maqsattaryń qandaı?
- Aldaǵy ýaqytta men Nazarbaev ýnıversıtetiniń bakalavrıat baǵdarlamasynda bilim alatyn bolamyn. Ol jerde oqıtyn mamandyǵym – elektrotehnıka jáne kompıýterlik ınjenerııa (electrical and computer engineering). Bul mamandyqty tańdaý sebebim mektep kezinen fızıka jáne matematıka pánderin unatyp, bolashaq mamandyǵymdy osy pándermen baılanystyrǵym keldi. Oqýymdy bitirip, óz bilimimdi ári qaraı damytýdy josparlap otyrmyn. Ózim tańdaǵan salanyń bilikti, ári bilimdi mamany bolý – meniń bolashaqqa qoıyp otyrǵan maqsattarymnyń biri.
-Táýelsiz eldiń jas ulany retinde Qazaqstannyń damýyna nendeı úles qosamyn dep oılaısyń?
-Men jańa ǵana mektep bitirip, ýnıversıtettiń tabaldyryǵyn attamaqshymyn, sol sebepten qazirgi ýaqytta qandaı úlesimdi qosa alatynymdy naqty aıta almaımyn. Biraq ta qazirgi maqsatyma saı oqýymdy bitirip, tájirıbe jınaǵannan keıin óz mamandyǵyma baılanysty energetıka salasynda eńbek etkim keledi. Osylaısha elektr energetıkasy nemese elektr tehnıkasy salasyn Qazaqstanda damytýǵa óz úlesimdi qossam deımin. Elektr energetıkasy úlken sala bolǵandyqtan, bir adamnyń eńbegimen barlyq másele sheshiledi dep oılamaımyn. Degenmen osy máselelerdi sheshetin jobalardy júzege asyrýǵa óz tájirıbe-bilimimdi jumsaı alamyn dep senemin.
- Elordada bilim alady ekensiń, qutty bolsyn, qadamyńa sáttilik tileımin!
- Iıa, elimizdiń astanasy Nur-Sultan qalasynda Nazarbaev ýnıversıtetinde bilim alatyn bolamyn. Elorda tórinde, Qazaqstandaǵy tańdaýly oqý ornynda bilim alý bir ǵanıbet qoı. Qazaqstan ǵana emes, shet elderden bilikti oqytýshylardyń kelip, dáris berýi nátıjesinde Nazarbaev ýnıversıteti, meniń oıymsha, elimizdegi eń deńgeıi joǵary, sapaly oqý ornyna aınaldy. Sonymen qatar ýnıversıtette stýdentterge tolyq jaǵdaı jasalǵan, sonyń ishinde zerthanalardyń, kompıýterlik kabınetterdiń oqý protsesinde úlken kómegi bar.
Eske sala keteıik, 136 ball jınaǵan túlektiń bolashaqta bilikti dáriger bolǵysy keletinin, Shynar Marstyń Nazarbaev ýnıversıtetinde bilimin jalǵastyrǵysy keletinin jazǵan bolatynbyz.