Energetıka mınıstrliginde jemqorlyqpen kúrestiń jańa tásilderi talqylandy
Energetıka mınıstri Nurlan Noǵaev qyzmettiń jáne kórsetiletin memlekettik qyzmetterdiń ashyqtyǵy men aıqyndyǵyn qamtamasyz etý boıynsha vedomstvonyń kúsh-jigerin jandandyrǵanyn atap ótti.
«Byltyr birqatar bıznes-úderister ońtaılandyryldy. Jer qoınaýyn paıdalaný quqyǵyn berý máselesi onlaın-formatqa kóshirildi, jer qoınaýyn barlaý jáne ıgerý jónindegi ortalyq komıssııanyń quramy kúsheıtilip, táýelsiz sarapshylar quramy keńeıtildi, qoǵam belsendileri tartyldy. El basshylyǵy men Úkimettiń tikeleı tapsyrmasyna sáıkes bul baǵyt jalǵasady», - dep atap ótti Nurlan Noǵaev.
Agenttik Tóraǵasy Alık Shpekbaev energetıka salasynyń qyzmetkerlerine júktelgen joǵary jaýapkershilikke nazar aýdardy: «Otyn-energetıka kesheni álemniń kez kelgen eliniń áleýmettik-ekonomıkalyq damýynyń lokomotıvi bolyp tabylady. Bizdiń memleketimizde ol basqa salalar men áleýmettik salanyń damýy men sátti jumys isteýine yqpal etetin bıýdjet kiristeriniń negizgi bóligin qamtamasyz etedi. Bul saladaǵy sybaılas jemqorlyqtyń mýltıplıkatıvti áseri bar, sebebi bolmashy sybaılas jemqorlyq táýekelderi tutastaı alǵanda el úshin aıtarlyqtaı saldarǵa ákep soqtyrýy múmkin».
Ol Atom jáne energetıkalyq qadaǵalaý men baqylaý komıtetiniń aýmaqtyq departamentterinde qyzmet alýshylar úshin qolaıly jaǵdaı jasaý jáne tutynýshyǵa baǵdarlanýdy qamtamasyz etý sııaqty azamattarmen ózara is-qımyldyń servıstik úlgisine kóshýdiń mańyzdylyǵyn eske saldy.
2020 jyly kelýshilerdiń qoljetimdiligin jeńildetý úshin Mınıstrliktiń ortalyq apparatynda ǵımarattyń birinshi qabatynda ornalasqan «Adaldyq alańy» jobalyq keńsesi ashyldy. Ár nıet bildirýshi azamat keńes alatyn nemese shaǵymmen júgine alatyn jedel jeli uıymdastyryldy (8-7172-786938).
Qyzmetkerler azamattyq qoǵam ókilderimen birlesip jer qoınaýyn paıdalaný, gaz jáne gazben jabdyqtaý salasyndaǵy problemalyq máselelerdi, sondaı-aq elektr energetıkasy salasyndaǵy baqylaý-qadaǵalaý fýnktsııalaryn zerdeleýge nazar aýdarady.
Osyǵan oraı Agenttik janyndaǵy arnaıy monıtorıngtik tobynyń jetekshisi Aıgúl Soloveva: «Mınıstrlik qyzmetkerleri jurtshylyq úshin ashylýy tıis. «Energetıka mınıstrligi – Adaldyq alańy« jobalyq keńsesi óz quramyna azamattyq qoǵam men BAQ ókilderin tartý arqyly ózara is-qımyldyń tıimdi alańyna aınalýy tıis».
Keńes barysynda ınvestıtsııalyq tartymdylyqty nyǵaıtý turǵysynan Mınıstrlik qyzmetiniń ashyqtyǵyn arttyrý máseleleri de talqylandy. 2020 jyldyń jeltoqsanynda alǵash ret jer qoınaýyn paıdalaný quqyǵyn alýǵa aýktsıondyq saýda-sattyq ótkizilgeni atap ótildi. 263 mln teńge deńgeıindegi jıyntyq bastapqy baǵa 230 eseden astam ósip, 61 mlrd teńgege jetti.
Eldiń ishki naryǵyna suıytylǵan munaı gazyn jetkizýdi avtomattandyrylǵan josparlaýdy engizý pysyqtalýda. Bul shara sybaılas jemqorlyq táýekelderin jáne adamı faktordy boldyrmaýǵa múmkindik beredi, bul óz kezeginde protsestiń ashyqtyǵyn qamtamasyz etedi.
Mınıstrlik elektrondyq alańdar arqyly saýda-sattyq kólemin kezeń-kezeńmen ulǵaıtýdy da kózdep otyr. Tolyqqandy kóshý 2021 jyldyń sońyna deıin júredi. Osylaısha, negizdelgen baǵa tájirıbesi qalyptasady. Bul mámilelerdiń transparenttiligin, eldi gazben jabdyqtaý senimdiligin arttyrýdy jáne kóleńkeli eksportty joıýdy bildiredi.
Munaı men gaz kondensatyn esepke alýdyń aqparattyq júıesin qurý da josparda bar. Shyn máninde, bul munaı men gaz kondensatyn daıyndaý, tasymaldaý, saqtaý, jóneltý, satý, aýmaqqa ákelý jáne elden shyǵarý monıtorıngi, baqylaý quraly bolady. Bul baǵyt Tsıfrlyq damý, ınnovatsııalar jáne aeroǵarysh ónerkásibi mınıstrligimen yntymaqtastyqta iske asyrylady.