Energetıka mınıstrligi: Jaıyqta jaǵaǵa shyǵyp qalǵan óli balyqty dereý jınap, joıý kerek

ASTANA. QazAqparat - Jaıyq ózeninde muzdyń erýine baılanysty qyrylǵan balyqtar jaǵaǵa shyǵyp qalyp jatyr. Osyǵan baılanysty Energetıka mınıstrligi óli balyqty jınaý baǵytynda jedel jumys atqarý kerektigin alǵa tartyp otyr, dep habarlaıdy QazAqparat tilshisi.

«Ózderińiz biletindeı, byltyr jeltoqsan aıynda Jaıyq ózeninde balyqtardyń jappaı qyrylýyna baılanysty arnaıy vedomstvoaralyq komıssııa qurylǵan edi. Ol komıssııanyń tóraǵasy men. Sol komıssııanyń músheleri búgin arnaıy kelip otyrmyz. Sebebi, qazir kún jylyp, Jaıyq ózeniniń muzy erip jatyr. Ólgen balyqtar sý beti men jaǵaǵa shyǵyp jatyr. Búgin biz katerge otyryp, Damby aýylyna bardyq. Vodolazdar ózenniń túbinen vıdeotúsirilim jasady. Keıbir BAQ ózenniń túbinde ólgen balyqtardyń óte kóp jatqanyn jarııalaǵan edi. Anyqtaǵanymyzdaı, sýdyń túbinde ólip jatqan balyqtardy kórip otyrǵan joqpyz», - deıdi QR Energetıka vıtse-mınıstri Sábıt Nurlybaı Atyraý oblysymen tikeleı beınebaılanys arqyly OKQ-da ótken telekópirde.

Vıtse-mınıstrdiń aıtýyna qaraǵanda, sýdyń sapasyn tekserý úshin sý men balyqtyń synamasy alynǵan.

«Biz sonymen birge «Amangeldi» balyq sharýashylyǵyna baryp qaıttyq. Olar birneshe kúnnen beri balyq aýlap jatyr eken. Aýlap jatqan balyǵyn kórsek, tiri. Árıne, tormen aýlanǵan balyqtyń ishinde ólisi de bar. Ózenniń jaǵalaýynda balyqshylarmen de sóılestik. Olar balyqtyń baryn aıtyp otyr», - deıdi Sábıt Nurlybaı.

Jalpy, osy máselege baılanysty halyqqa alańdaýǵa bola ma? Uzyn-sonar suraq-jaýaptan keıin Sábıt Nurlybaı osy saýalǵa bylaısha jaýap berdi.

«Jaǵdaıdyń qandaı ekenin óz kózimizben kórý úshin Atyraýǵa keldik. Jalpy, jaǵdaıdy baıqadyq. Bizdi eń aldymen sýdyń sapasy alańdatqan edi. Biraq, búgin Qoǵamdyq densaýlyq saqtaý komıtetiniń tóraǵasy Jandarbek Bekshın birneshe ret sýdyń sapasy jaǵynan másele joqtyǵyn alǵa tartty. Kelesi másele: bizde ólgen balyqty joıýda problema bar. Búgin Jaıyq ózeniniń jaǵasynda ólgen balyqtyń shyǵyp qalyp jatqanyn kórdik. Sol sebepti, ákimdik jastar jáne eriktilermen birige otyryp, bul ólgen balyqty dereý jınap, joıýy kerek. Sebebi, bul jumys óte mańyzdy másele. Sonda ǵana halyqta alańdaýshylyq bolmaıdy. Qazir muz eridi de óli balyq sý betine shyǵyp qaldy. Álbette, mundaı jaǵdaı halyqty alańdatatyny túsinikti. Sol sebepti, ákimdik bul rette jedel áreket jasaýy kerek», - deıdi Sábıt Nurlybaı.

Óz kezeginde Atyraý oblysy ákiminiń orynbasary Álibek Náýtıev 7 naýryzdan bastap Jaıyqtyń muzy erı bastaǵanyn atap ótti.

«Osyǵan baılanysty shabaqtardyń ólekseleri jaǵaǵa shyǵa bastady. 7 naýryzdan bastap shabaqtardy jınaý jumystaryn júrgizip jatyrmyz. 10 naýryz kúni senbilik uıymdastyryldy. 16 naýryzda qalalyqtar bolyp senbilikke qaıta shyǵýdy josparlap otyrmyz», - deıdi ol.

Esterińizge sala keteıik, buǵan deıin Atyraý oblysynda balyqtyń qyrylǵany týraly birneshe aqparat jarııalaǵan bolatynbyz. Naqtyraq aıtqanda, ótken jyldyń jeltoqsan aıynyń basynda Atyraý qalasynyń syrtyndaǵy Peretask shaǵyn ózeninde balyqtardyń jappaı qyrylý oqıǵasy tirkelgen edi.