Energetıka mınıstrligi tarıfterdi belgileý boıynsha tyńdaý ótkizedi

ASTANA. QazAqparat - Qazaqstan Respýblıkasynyń Energetıka mınıstrligi energııa óndirýshilermen birge 2019 jyldyń shekti tarıfin aıqyndaý úshin tyńdaý ótkizedi, dep habarlaıdy QazAqparat tilshisi.

Jýyrda Qaýipsizdik Keńesindegi otyrysta Memleket basshysynyń elektr energııasynyń tarıfterin qalyptastyrý máseleleri boıynsha júktegen mindeti men «Elektr energetıkasy týraly» zańǵa sáıkes, Energetıka mınıstrligi 2019 jyldyń negizdi ári shekti tarıfin aıqyndaý úshin jumys júrgizip jatyr.

Tyńdaýlar kestege sáıkes ótkiziletin bolady. Ol otyrystarda 2019 jyldaǵy elektr energııasynyń shekti baǵasyn aıqyndaý úshin 2018 jyly óndirilgen elektr energııasynyń ózindik baǵasy taldanady.

Qazirgi tańda «Qazaqmys Enerdjı» JShS, «Topar basty úlestirý energostantsııasy» JShS, Shymkent JEO, «3-Energoortalyq» AQ, JEO -2 jáne «Arselor Mıttal Temırtaý» AQ JEO, «Sogra JEO» JShS materıaldary zerttelip jatyr.

Aıta keterligi, 2019 jyldyń 1 qańtarynan bastap elektr energııasy naryǵymen birge sektorǵa ınvestıtsııalyq tartymdylyqty qamtamasyz etýge baǵyttalǵan elektr qýattylyǵy naryǵy jumys atqaratyn bolady.

Qýattylyq naryǵy engizilgennen keıin elektr energııasynyń tarıfi eki bólikke: elektr energııasy tarıfi jáne qýattylyǵy tarıfine bólinetin bolady.