Energetıka mınıstrligi Reseı ımportyn tómendetý úshin Qytaıdan 200 myń tonna benzın almaq

ASTANA. QazAqparat - Energetıka mınıstrligi 2015 jyly tollıngtik operatsııalar aıasynda shamamen 200 myń tonna benzındi Qytaıdan alýdy josparlaıdy. Bul shara Reseıden benzın ımportyna táýeldilikti birshama tómendetpek. Búgin Májilistegi «Nur Otan» partııasy fraktsııasynyń otyrysynda Energetıka vıtse-mınıstri Uzaqbaı Qarabalın málim etti.

Vıtse-mınıstr sóz arasynda elimizdiń janarmaıǵa ishki suranysynyń bir bóligi tollıngtik operatsııalar boıynsha Qytaıdan jetkizý arqyly jabylatynyn atap ótti.

«2012 jyldan bergi kezeńde bul operatsııa aıasynda 284 myń tonna avtobenzın ákelindi. Sonyń ishinde 130 myń tonnasy aǵymdaǵy jyldyń qańtar-qyrkúıek aılary arasynda bolyp otyr. Mundaı sharanyń tıimdiligin eskere kele, Energetıka mınıstrligi 2015 jyly da tollıngtik operatsııalar boıynsha shamamen 200 myń tonna benzın ákelýdi josparlap otyr. Bul rette ishki rynok shamamen 168 myń tonna joǵary oktandy benzınmen qamtylatyn bolady», - dedi Uzaqbaı Qarabalın.

Onyń aıtýyna qaraǵanda, atalmysh shara Reseıden benzın ımportyna táýeldilikti birshama tómendetedi. Aıta keteıik, Qazaqstanǵa Reseıden ımporttalatyn janarmaı mólsheri jylyna 12-30 paıyz aralyǵynda bolyp otyr.